Ses nuscu 'e poesia
lucore 'e dilichia
ube braghera bibet sa fortuna.
Jana d'anticu amore
chin tramas de lentore
intesses bestes a sole e a luna.
In nottes isteddadas
chin sas pupias cantas serenadas.
Frore de bona sorte
binches peri sa morte
chin sa durcura tua 'e sa bellesa
chi luchet a ispantu
che corona 'e santu
in àgheras pintadas d'innidesa...
Intro su lettu, nuda,
ti pesso disizàndet'a sa muda...
Su samben in sas benas
tra risittos e penas
curret pessande a tìbe, terra sana.
Ti disizo che rosa
profumada, dizzosa
d'amore friscu, bìrghine funtana.
Lampizu manzanile
mi carinnas de coro su jannile.
Unu malune 'e frue
si ses cuntenta tue
t'intrego chin sos nuscos de su coro;
a sapore 'e padente
e de abba currente
in s'intranna 'e sa terra,prend' 'e oro:
fruttu sanu 'e titta
de sa natura-mama beneitta.
Commo chirco un'umbrache
in s'oru 'e unu nurache
pro pasare sos pessos in sa mente.
Sun che traschia 'e bentu
no accattan apentu
si tue,sole meu,ses assente.
No han pasu in neddue
s'intro su sinu non los ninnas tue...
Giovanni Piga (Nuoro)
2° premio 2005
(Sezione tra poesia e canto «Pietro Pisurzi»)