Seighi 'e jennarzu.
Comente falat sero in bidda mia
dant fogu a s'isarmentu. ·
E cando brusian innieddighende
sas naes de suerzu,
sas ses inghiriadas sun pro te,
Sant'Antoni porcarzu:
tres ziros a deretta,
tre ziros a s'imbesse;
isorvere a un'ala,
a s'atera ligare.
Su seighi 'e jennarzu
sas carrelas
han fragu 'e ferru alluttu
in bidda mia.
Sa fozzisina 'e sa matrigusa
si perded in s'aera infrittulida
ei sas framas limbudas
che tentassiones malas
la pissighini.
Seighi 'e jennarzu:
in su coro 'e s'ijerru
isettos de eranu.
Pius a tardu
a ziru 'e sos tittones brusiados
che famiglia cuncorda in bidda mia
sezzit sa zente

e isettat sa notte
su seighi 'e jennarzu.
Sant' Antoni porcarzu,
cando torro
su fogarone meu had' a pesare
framas cantu sas nues.
Sas ses inghiriadas
- tres ziros a deretta
tres ziros a s'imbesse -
las fatto a pes iscurzos
subra sas pedras cardas:
isorvere a un'ala,
a s'atera ligare,
su seighi 'e jennarzu.
In custa terra fritta senza santos
nessuna isperanzia de eranu,
e andendhe
che umbra senza vida
ch'es garriga 'e ammentos
si m'arpilada
a titillias de frittu sa carena
su seighi 'e jennarzu.
Su seighi 'e jennarzu
sas carrelas
han fragu 'e furru alluttu
in bidda mia.
A ziru 'e sos tittones brusiados,
che famiglia cuncorda
sezzit sa zente
su seighi 'e jennarzu.

Maleittu
su die ch'hapo lassadu cussas roccas
assoliadas
pro custas umbras frittas.
Maleittu
s'ammentu chi mi ligada,
su bisonzu
chi m'ispinghet ramingu
che unu pedidore.
Maleitta
s'isperanzia 'e torrare
chi m'isfinidi.
Eppuru isto timende
chi si sensede inoghe su viazzu
e chi m'istruada
custa ozza 'e torrare a una orta.
Custu isto timende.
Né piu bida
sas framas artas de su fogarone
ch'azzendene pro te
Sant'Antoni porcarzu
in bidda mia.
Cando brusian sas naes de erdone
e allumana
in su coro 'e s'ijerru
isperas de eranu in bidda mia,
m'arpilan sa carena
titillias de frittu
prus de mai
su seighi 'e jennarzu.