Zeo torro a-sa cussorza mia

A minore
in iscola
m'han intregau unu libru
iscrittu da-e sos mastros de su mundu.
Chi l'impàres
sa dottrina
'e sa vida; deves crescher
chin s'arcu in manu

ca bella est sa gherra po un'Elena

e groriosa est sa morte.
Gasi
sa prima pazina

chin s'òrulu pintau a fozas d'oro

comente chi esserat
una serenada de amore

mi narat de sos primos
abitantes de sa terra

bessinde da-e sa rutta a preda in punzu
po si-la alanzare sa cussorza.
Irfòzolo debadas cussu
chircande unu reposu a sa battalla.
Menzus torro a sa cussorza mia
in su 'ichinadu 'e sos nuraches.
Ind'una matta 'e chessa
b'hat crochind sa tortura

felitze 'e non cumprender
sas pazinas nieddas
de s'istoria 'e su mundu.
Los fùo
sos capitanos de su gherra - gherra
chi no' han atteru in coro
che-i sas medallas d'oro
'e sa groria de sa morte.
Happ'a gherrare

ma chind'unu iscudu 'e vrores
e paraulas de amore.
Oje est ridente sa die

fachet serena s'anima

e serenu accumpanzo
su sole chi si-ch'intrat
in su monte.
E-i custa notte m'isposo sa luna.