Trattas


Su contu amurosu de Càrmine e Gavina
pariat finidu su sero de unu istiu longu
cun allegas de pagu
imprastu e unu àstiu rangulosu a dominare subra 'e onzi cosa
cumpresa cudda siguria
chi finas
a pagu tempus prima fit cussiderada amore. Sos cuntrastos
pesados a sa lena
fint irtzopados de
bottu
comente bubullacas de sabone
cun issos intro
ambos riflissos in sos colores de unu sentimentu
chi si pariat no esistere prusu. Comente chi una campeada innida e jara si fit mudada repente
in d'unu mundu 'e neulas
dae su cale onz'unu chircaiat de nde 'essire a modu sou.
Sas rusas fint paritzas
tottas chena fundamentas
tirriosas a etzessu
ma sas ùrtimas reas fint sas paràulas

àntzisi
una paràula sola. Cudda chi curriat sempre a brintzis proas
cun s'intentu miradu de
accudire ùrtima. S'ùrtima peràula
pretesa a marrania dae onzunu. E pessare chi faeddaiant paritzu

mascamente cando teniant prus pagas novas 'e si contare
cun d'onzi faeddu chi lis bessiat
intintu
cun arte in su velenu
chi solu s'amore a fine contu solet dare. Pustis sas zarras fint diventadas
solu sonos disintesos
chi ambos si iscudiant appare
assumancu ch'esserent isgarrigas de mitragliera
chi antebitzaiant sa fine. Puru sas peràulas
istraccas de no essere cumpresas
detzideint a pustis
de restare in bula
impuntadas in d'unu ammutinu isfiadadu. Issos si che andeini
onz'unu a
contu sou
in su trettu mudu de una cummedia finida
pro cuare de sos amantiosos sas penas
lassende
a sos meledos e a s'olvidare de su tempus
tottu s'imprastu de cussu contu amorajolu.
Fit interighinende da chi Càrmine aiat abertu sa zaga 'e foraidda. Su cane li andeit acurtzu
festulanu
iscoittendeli in pes
guasi a lu cherrer disattinare dae s'amargura chi teniat in coro.
No fit sa prima 'orta chi brigaiat cun Gavina. Antzisi
bi incappaiat de fitianu e sas chistiones sempre
prusu finiant pro che iscansiare fora 'e surcu. Ma
appoi 'e sa temporada
torraiat su selenu
e
sas ganas a si pesare
in s'attoppu de sas carres
cun sa fortza de unu uraganu. Cun custos cussidèrios
in conca e a craes in manu
est andadu a chirru 'e domo. - Sutta sa bèrgula in sa cortita
unu
lettu 'e fozas fit isterridu che tapette mobile
sensibile a carchi alenu de 'entu
chi 'onzi tantu las faghiat
muliare. Intendeit sonare su tzellulare. Penseit subitu a Gavina
fit sutzessu atteras bortas:
«De su restu - naraiat in coro sou - sas peràulas passant. Eppoi... fit tocadu senpre a issa de fagher

su primu passu. Mi appo a mustrare cori tostu
ma... sarva sa cara...che a sempre
bi l'appo a perdonare».
Nde 'ogheit cun dàsiu
su tzellulare dae busacca
mireit in su display
ma no fit Gavina.
Un'umbra li passeit in pessamentu. Fit solu unu amigu: «Ite istranu però
chi Gavina
no appet telefonadu
ancora; ma!... No b'at de si nd'appenare; at a telefonare prus a tardu. Antzisi
si no telefonat

est menzus puru!». Penseit guasi indispettidu pro si nd'accunnortare: «De su restu
s'amore est
dissimile dae s'amistade
est diffitzile chi potat essere unu 'estire adattu pro onzi istajone».
Ma Càrmine si sentiat tristulanu e inchietu.
Ortada sa crae in sa tuppa
si ch'est intradu a domo
chena ischire ite faghere pro isvortare su pessamentu

cunvintu comente fit
chi s'arrastu 'e sa gurpa
comintzende a si pesare a sa lena
prima
o poi si che fit andadu
lassendeli su coro in pasu. Si sentiat comente istronadu
in d'unu trettu de
rara preìtia 'e conca
chirchende tott'in ziru
chena ischire itte. De bottu
s'interessu sou ch'est
ruttu subra unu libereddu 'e cantones
dae tempus in aisettu de esser lètzidu. Si corcheit in
s'ottomana
cun s'intentu 'e intrare in su sensu imprentadu
ma
a pustis de paritzas pàzinas
no
s'ammentaiat nudda. Aiat solamente repassadu
cun sa mente
tottu cantas sas allegas de sa die.
Miraiat ottora su tzellulare chirchende chena afficu carchi sinnu
cun d'una soledade chi pariat fitza
'e cussu trastu elettronicu in ammutinu e torraiat cun sa conca a Gavina. Intreit
tando
in pessamentos
de nudda
cun sa fiacca in s'ànimu e-i sa volontade atterrada. Impestantu
su 'entu 'e maestrale

si fit pesadu a li iscussertare sa conca
fruschiende chena pasu in sas chimas de sas arvures.
Si intendiat sa portetta de unu braccone
attappadu
a tzìulu lamentende s'abbandonu
ma no moveit
unu poddighe. Cussu sero
su cane
onzi tantu
appeddaiat sas milli rejones suas
a una luna chi no
bi fit. Pesseit a s'istòja
l'aiat tepida imboligare pes tempus e remonirechela in s'isostre
invetze fit
restada in sa cortitta pro essere ortulada che a issu
a cudd'ala 'e s'istiu.
Resteit ammaudinadu
chena carculare s'ora
lassende chi su murmuttu de su entu li esseret intradu
in conca
pro olvidare sa die
cun sas oras andantanas
lentas e prenas de amalgura.

Unu surtu 'e sonnu l'est 'intradu repente pro faghere agabbare sa pena. A notte manna si
nde est ischidadu allutzighende a longu in s'iscuru. Impestantu
su 'entu si fit pasadu e su mudine
dominaiat sa notte.
Pariat cussa un'avreschida 'e chisina
prena de nues bassas e minettosas
cun Càrmine falende
in s'istradile chi andaiat derettu a mare. Platamona fit pagu attesu
si iscampiaiat a malapena

posta comente fit intro de una traschia chi pariat ghirada dae logu furisteri. S'Asinara negaiat a
s'ograda su bellu de un'incrarada de incantu. Su cane andaiat in dainanti
onzi tantu si abbarraiat a
nuscare sa terra e pustis sighiat a caminare coidadosu
appistighinzadu a modu sou de no essire dae
su trettu 'e sos afficcos. Accurtzu si intendiant sas undas pretiosas de su mare e fint craras sas trattas
de sa marettada: zoghittas
conchizas boidas e paza 'e mare. Ma su trettu primu de sa plaja fit 'estidu
a friscu de unu tapete de rena innidu chi pariat aisettende su primu passu 'e sa die.
Su cane fit intradu luego a pes a modde
currizende; Càrmine peristantu
a trettu dae s'abba
si
nde 'ogheit sos bottes
falèndeche sas peadas in s'irmoventu 'e sa rena.
Sos pessamentos in cuss'ora pariant solu arrastos
chi lassaiant in conca sensos de seru incumpridu

ligadu a su mare cun acraradas retentivas.
Millu
penseit "su mare de navigadores e poetes
de sa morte de sos sonnios e...de Ogigia
restada
in sas isperas mortales. Su mare de undas e tempestas chi roent sos oros
andant e torrant che trettos
de vida. Poi...comente amores impasados
si chircant sempre pro no si agattare mai".
In cussa soledade
teniat su sentore de esser intradu in su ferulau irdisidu de una cartolina 'etza
imbiada
in tempos antigorios dae unu mittente isconnoschidu.
Pariant in chirca de autore
cussas undas pretiosas restadas in aisettu a manzanile in d'una plaja
chena poetes
murmutende versos de poesia
chena b'esser niunu a nde collire.
Miraiat sas trattas suas affundendeche in sa rena
cun su sentore de esser unu noitolu Robison Crosuè
in d'unu mundu ancora nìbidu. Su cane si godiat su trettu 'e sa libertade sua e
guasi cun cussènsia
e cussideru
torraiat issegus a iscuttas
comente a cherrer narrer chi li fit accurtzu e pustis sighiat
a zoghittare cun sos nuscos e-i s'abba. A unu tzertu puntu
benzende dae montizolos de rena

postos a manca
Càrmine nde peseit sas trattas de atteros pes
chi si fint affranzados a sos suos e li
faghiant caminu
lendecheli cuddu sensu primarzu chi pessaiat acraradu. Si fit allertadu de bottu

dae una ispètzia de assèbiu allentoridu e
pesende arta sa crista
mireit
sas trattas andende
jaras e
pressadas in cussas istèrridas de rena frisca
postas in sas longàrias innanti a issu.
No bideit niunu
ma li fit pàrfidu de intendere
in cuss'iscutta
unu sentore isconnòschidu e li 'enzeit
in animu de si ponner a currer in sa rena
pro pessighire cussos passos
insistentes e coidadosos

chi pariant lu cherferent cumbidare a dare cara a sa resone 'e su mistèriu. Iscarteit s'idea e
ponzeit frenu a s'istintu
andendelis a costazu
antzis incurtzinende sos passos suos
pro adattare
s'andanta a cussos imprentados in sa rena. Si fit abbistu gai
chi sas trattas sighidas fint lèbias e prus
minninnas de sas suas. Pesseit a carchi criadura o carchi femina pitzinna
chi lu aiat coladu pes tempus

arrischendesi in cussu logu cando fit ancora iscuru
in d'unu assèbiu de soledade impasada.
S'ùnica seguria fit chi cussos passos aiant caminadu sa notte a pustis de sa tempesta
in sas longàrias
de sas undas
chi comente filu de Arianna aiant iscraridu s'iscurigosu.
Ma ite bi faghiant?
si pregunteit Càrmine "a inue andaiant cussas trattas in cuss'ora impossibile e
a fora de cale si siat pessamentu?". Aiat chircadu rejones
irvermigheddende a longu
ma manc'unu
pariat assortadu pro appagare tottu sas preguntas
postas in oriolos de conca. Camineit paritzu pessighende
cuddos passos
finas a cando peri custos si sunt frimmados
in attoppu de atteras trattas
a
trettos jaras e meda prus mannittas
accudidas in soledade dae parte contraria. At miradu gasie sas
appeigadas chi si ammischiaiant appare fintzamentras a si cunfundere
bortendesi tra issas in d'unu
intrabòju e trama mala a cumprendere
guasi zenia 'e dansa immazinària
in d'una loriga 'e rena
chi acudiat a serentare sas undas.
Ma cale sensu dare a cuss' ispètzia de ballittu
testimonzu de unu attoppu istranu
no si cumprendiat
si amorajolu o rebbestu
cumbinadu in oras e logos impossibiles
cando ancora su mundu
fit ingalenadu e-i sa notte no aiat passadu a tando
sas cussinnas a sa diada noa.
Poteit pesare a pustis solu sas trattas mannas
andende a manca acchirradas a sos montitzolos de
rena
prenos in cussu trettu de tuvas e nìbaros crannugados dae sos bentos
mentres chi sas minninnas

che mistèriu arcanu fint isparidas de su tottu
comente ingullidas in su nudda.
Li 'enzeit s'istintu 'e andare innanti ma una tzerta timoria li faghiat de contra e de frenu pro no si
ponner sa sorte in pretzipitu
intrende in d'unu contu 'e mistèriu chi bastante lu aiat imboligadu in
d'unu ispetzia de ammàju lèbiu. Resteit frimmu comente prantadu subra sas dudas suas
indetzisu

chena ischire si andare contra o sighire sas trattas chi nd'aiat pesadu sa die.
Azummai si fit irmentigadu de su cane
e no bidendelu cominzeit a lu cramare
poi lu torreit
a cramare gàlu
ma su cane
de solitu sempre coidadosu no s'idiat illogu.
Angustiadu
'isteit che prantadu cun d'unu sensu de desolu in coro
sigheit a cramare
finas a cando
su sonu'e sutzellulare ndel'at ischidadu. Mireit in su display: ma no fit Gavina.
S'ogru peristantu che fit ruttu in su liberu 'e cantones restadu abertu dae su sero prima.
«Inartu.
Corvos de mare frimmos
aiant pasadu sas alas
in sa notte de unu pintore tzegu
chi 'endiat orizontes de faula
pro agattare in sos ammentos
sos colores de su mare sou»