Informazioni sull'opera
ELLERA
Tocat a passu cagliadu
finas sa metalla chibera 'e sos fortes
in d-unu tretu 'e su die
cando agabat sa batalla.
Est cussu giassu una chinnida de ogros
o una vida.
Ca tenzo de matessi rebula sa raglia
- fiore de mendula e tiria -
a sa lacana 'e sos contos cunzados
mai l'isfranco.
E tzerdas de afannu ti carro
e turunzos impudados. Ma...
...ite ispannu! Coro meu... a ti 'olare
in s'anima cun sa puma arpiliada
e in punna de mi 'ortare in pane
ufradu dae braja noitola.
Si assendo abolotadu
semper torro a popore friscu
pro sighire s'imbreaghera lassinende a rodeu
in baddinosu ausentu
galu sustentu de atera vida.
Tue
foza balentiosa
basas mujada
sa corza 'e sas laras
e intzertas su chiu a su parpu
cando su esser nudda m'est gosu.
Sos bratzos tuos...
astrinta isparta de brussos antigos
pedrales
mai grae m'an intesu.
Nemmancu cando farta bandulera
atesu nos partiat cun biaitas cuguladas.
A s'irmurinada
atoladas sas faltzas ventanas de su risu
atera lughe nos pintat sas pupias.
Tando cunzo sas meas
e nos chirriammus paris dae sa gama
a bortas fertos ma semper reos.
E tue
ellera fidele
mi suspis dae ogros su lentore
ca su tou est de mama
s'amore...
Titolo | ELLERA |
Sezione | |
Autore | Atonimaria Pala |
Nome | B20040068 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |