Su baballoti traitori

(arrepentina de spera, a sa dereta)

Ti cantu un’arrepentina e dda fatzu a sa dereta,

custu po scoviai sa treta, ma a dda cantai seu prontu,

de su càncuru su contu ti ‘ollu nai cun cuncu versu,

po chi me in s’Universu acabit su pistighìngiu.

Mannu est su murighìngiu, si scoberis su mali:

che a is atrus est aguali e si podit(i) domai,

mai a prangi, arguai!, ca t’agiudat(a) sa scièntzia,

e no tengas suferèntzia, mancai pàrgiat infadosu,

no ti pighit su nervosu: bessit a traitoria!

In is logus cosa mia, sena de fai burdellu,

a sa cua, abellu abellu, fut(i) giai spraxendi-si(a);

nci bolit sabidoria contras de su mali frassu,

depis essi tui capassu e finsas(a) ingeniosu,

tzertu no est chistioni ‘e gosu, ca ti tocat a gherrai,

parit simpri a ddu nai, ma crei-mì ddoi seu passau,

u’incueddu mi nd’ant segau, ca ddoi fut su baballoti,

ddu timia che marragoti, comenti faint is pipius,

no creia a is ogus mius, candu mi dd’ant amostau:

cunnu chi ndi-dd’at fuliau! M’at pigau a su stintirigu.

Incumentzat dònnia amigu a mi nai ca seu corriatzu

e sena de fai stragatzu su coru in manus pigu,

castiendi-mì in su sprigu, m’apu nau a mei etotu:

“No ti pighit s’avolotu, ca no podit binci issu”!

E mandau dd’apu unu missu, po ddi nai ca gei ddu gherru:

su coràgiu deu m’aferru, curru a su spidali, a innia,

cun sa radiuterapia ndi-ddi giaint una passada,

ma sa carda est cunfirmada cun sa chemiuterapia,

apustis sa chirurgia una trampa gei dd’at tèssiu,

e su càncuru sparèssiu est de sa personi mia,

o forsi’ est ancora innia, ma gei timit a bessiri,

ca si mi ddu fait a sciri, ddoi torraus a fai is contus,

a gherrai torra seus prontus, po dda sperdi custa arratza,

ddi paraus fronti cun atza e sigheus in su caminu,

su càncuru a casinu, scutu a fusti, nci at a andai!

Tiria - Prammas, su 24 de làmpadas de su 2022