Premio Ozieri di Letteratura Sarda

S’oràculu

De Atena su seru
e d’Atene
lampizos d’antigas saviesas
m’at dadu s’oràculu miu digitale
bocand’a craru arcanos
de deos e de mundos.
Missale de custos tempos novos
po dònnia dimanda at un’imposta
chi ponet sas alas
a bolos de paràulas e de pessos.

Mortas sas prendas betzas
chin sas noas m’apento
in imbriagheras chen’accabadorzu
d’utopias lugorosas
e promintas galanas
chi m’isturdint
e m’accumpanzant
in àndalas de acòru e soledade
faghèndemi irfainare
chintales de ispera
e temporadas mannas de sentidos…

Chin s’istimau siddadu ben’istrintu
pèrrico in impredados
ue solu unu cane istat in runda
travicande su mere
a nara-iscurta in su telefoneddu.

Tot’in d-unu m’abizo irraighinadu
chen’orgògliu
nen bisos
ne una limba
chi toccheddos de coro mi daiat.
Mesu umanu e mesu màcchina
galu non resesso a iserrenire
s’est sa carena mia unu roboto
chin su coro de òmine…
o si sa carre est carre
e s’anima
solu artefata ispipillesa…