Premio Ozieri di Letteratura Sarda

Chi tue los retzas in alas
de càntidos òrficos pagu
bi creo. Prus fàtzile meda
istranzes in mutas de dìl-li-
ri-dìl-li-ri o puru a su bòm-bo-
ro-mbò noitolos orfeos
in s’ena ‘e Sos mudos Enatos
a tràer’ da’ intro su mù-li-
na-mù-li-na ‘e pìdigas undas
astrales… pispizos arcanos.
E creo, su lenu ischimuzu
-de àteras àndalas signu
noale- si puru annos lughe
repichet atesu dae te…
anzenu non t’at a sonare.
Ammentas? Attùami e lassa,
tra benas de prata e galena,
forrojen in te, sabidores
d’ischire ‘enidore, s’antigu
mudìmine tou: madrighe
ch’ atarzat orija a distìngher’

s’isteddu a su tinnu ‘e s’ischìglia.
E gangas a frùere muta
de frundas, fiados e frinas
in cantos a mundos addae
Ma tue, barbàrica musa,
chi mudas budrones de astros
in chìndalos mudos, pispiza
s’ajò a Orfeos de domo
pro chi no recuan debadas.
E chìnghelis s’atza cun tundas
grigliandas d’alenu. Che cussas
chi benas de res sonadores
apretu prus tundu ponian
a dillos in nuntas de zentes
nuràgicas. Forsi’ a cuncordu
cun cussa matessi maretta
de tempus e logu ch’oìre an
a pòdere cras fizos tuos
pro nd’àere sònidu e seru.