In sos littos chi a malappena colsa
pro b'arrivare cun d'unu runzinu,
sunt sos triuttos fattende festinu
cun su trigu 'e sas ultiamas alzolas.

Omines cun acchettas noitolas
andant e torrant in s'aspru caminu
incunzende su fruttu genuinu
da sas duras fatigas campagnolas.

Is sos baddijos mazzende su linu
s'intendent tibi—taba sas mattolas.
S'argheda puru est a ciarra continu

preparende tribagliu a sas ispolas.
Un'ardore de operas divinu
bides ue cun s'oju ti che imbolas.

SARdannu


ISCENA RUSTICA

Unu manzanu, giustu a s'impuddile
passende che mazzone in sutt'a raglia ,
si mi nd 'e st fertu intro su cuile

unu cane runzosu'e mese taglia.
Prin'a murrunzu poi bau–bau
Si pesat tota in bolos sa canaglia

de sos braccos ligados a cannau
tot'in giru a sa mandra.In sa pinnetta
finzas so'attu si tuccat mau-mau

contr'a issu artuttida e inchietta.
Un'ainu arrazzadu in Currapè
si li truvat umpare cun ss'acchetta.

Cust 'a nnijende che fora 'a se,
cuddu ronchende ca fit s'istajone,
che chi esserat bennidu su re

Isparesit a salve su cannone.
Sos molentes de tota sa cussorza
Intonesint prezisa una cantone.

Cha chi l'haerent segad'a resorza,
ca da–e coro m'enzasit su risu,
in chintu si m'istruppat sa chintorza.

S'adde, ancora dormida, a s'improvvisu
s'est ischidada a su tantu burdellu
e cun s'eco sonora hat cundivisu

s'animalescu, comicu duellu.
Ispuntesi intantu in s'orizzonte
do au nenzenu au sole noellU

chi mi riesit benignu in su fronte.
Cussu cane runzosu in mesu ancas
Si ponzesit sa coa e de su monte

mancu pedras tocchesit cun sas francas .


SARDIGNA

Fiat tra totu sas isolas Tirrenas
in mesu mare sa pius assolada.

Sempr'in s'isettu de dies serenas
sola in tant ' abbandonu ses restada.
Si ti promittint oro a manos pienas
cust'est signale chi ses calculada,
si como narant:"..largu in dogni gianna
pro dare passu a sa...celeste manna".

Ischimos chi falada est da—e chelu
sol' una olta sa manna celeste.
Tando su sardu de benda unu velu
giughiat in sos ojos, fit areste
e mustraiat solu cura e zelu
pro fagher sogas e filare reste:
ma su sardu modernu, a bonu contu,
no est pius dormidu e no est tontu.

Si sas operas bonas sunt fattende
de las haere nd'hamos su dirittu
ca de las bider a lughe oghende
finis pro tantos seculos appittu:
no lis semos abberu pretendende
s'Isfinge, sas Piramides d'Egittu
chi 'enzena in Sardigna fraigadas
o puru in custa terra trasportadas.

Isfidet sas immensas solitudines
de medas vias su biancu nastru
e cantet sa "rinaschida" su mastru
cun s'ischente a mattana in sos incudines;
pro chi sas abbas no fettant disastru
lis regulent percursu a abitudines:
de su progressu passende in caminu,
sa Sardigna trasformere in giardinu.

Ma eo forsis troppu sonniadu
happo Sardigna mia a oju abertu.
Cessat su sonnu e m'agatto ischidadu
in d'unu mundu d ' affettos deserta
ue su colzu, su malefadadu
attastat su terrinu a pe incertu
invochende, senz'odiu nè rancore,
Pro issu puru un'aizu ' e amore.

SARDHANU