Su Cestinu

Est'in vergas e cannas costruidu
Do misuras e formas variadas
Recipiente usadu e conoschidu
In medas regiones e contradas

Lu ides bene fattu e adibidu
A cunservare cosas prelibadas
Oppuru troppu rozzu e avvilidu
Cun cosas bruttas e rifiutadas

S'ischet ca bind'hat unu ind'un'Uffiziu
A sa sinistra su Redattore
De unu periodicu noviziu

Aih! cantas fatigas e sudore
Finin in cuss'orrendu precipiziu
De sos poetas sardos su terrore

Meschinu


Protestas a sa Musa

S'ateru die nd'happ'intesu duos
Chi si fin cun sa Musa lamentende;
Un'a s'ateru infatti li fit nende
Chi non bi fini sos sonettos suos

Ma sò intervenidu a la difende
Cun argumentos e faeddos cruos
Ben'ateru sa Musa istat pensende
Che pubblicare sos. sonettos tuos

Veramente però est capitadu
Chi porcherias de Beniaminu
Sa Musa prontamente hat pubblicadu

a sos capolavoros de "Meschinu"
Chi sa manu crudele hat censuradu
Passan direttamente a su cestinu

Meschinu


Sa Lima

Adoperada cun delicadesa
Servo pro nde ogare onzi diffettu
Massime cando ind'unu datu oggettu
Mancat elementare onzi finesa

Cun paziente manu e cun destresa
Perfeziono su ch'est imperfettu
Cun migliore decorosu aspettu
Nde cumpleto s'armonica bellesa

Usada cun valente maestria
E cantas cosas no happ'abbellidu
In sa scultur'e in sa poesia

Ma presentadu coment'è bessidu
Su fruttu 'e s'umana fantasia
Senza s'opera mia est'avvillidu

Meschinu