Adoro sa campagna,
sa solitudine immensa

AURORA E TRAMONTU
Ovvero
(S'argumentu de sos contrarios)

Cando sa prima lughe mattutina
tinghet in oriente chelu e mare,
isplendidu quadru est de mirare,
chi cumpendiat s' opera Divina.

E segundu s'eterna disciplina
chi solit vida e morte ispiegare,
non podet su contrariu mancare
tra chelu e monte, in s'ora vesperina.

Comente su Supremu Criadore
hat contrappostu custos elementos:
vida - morte, lugore - oscuridade,
hat decretadu chi s' umanidade,
in lotta tra oppostos sentimentos,
vivat tra isperanzia e timore.

(SALTARUS)


INUTILES FRONTIERAS

Cand'in sas ispiaggias de Caddura
tirat una lezera tramontana,
sas boghes de sa zente Corsicana
paret chi passen su cunfine a fura.

Su sero, mentre godis sa friscura,
sos bentos, a dispettu 'e sa dogana,
nde trasportan su sonu 'e sa campana,
ubbidende a sa legge , e sa natura.

Cando da-e campanas furisteras
su dulze sonu de s'Avemaria,
in tottu simile a su nostru intendo,
giuro chi veramente non cumprendo
proite mai, s ' umana genia,
sighit a costruire frontieras.

(SALTARUS)