"A un'alvure sicca"

I°


Vigorosos sos pampinos as giuttu,
de primmavera, in sas novellas festas,
e oe, in sa campagna, arida restas,
sicca, senz'una foza e senza fruttu.

Perennemente, in segnu 'e triste luttu,
a sa vida mattessi manifestas
chi tantas suas "punturas" funestas
su fecundu vlgore t'han distruttu.

Ma ses modell'e nobil'esemplare
de ispiritu puru, sanu e forte
ca ti ses sicca pro su troppu dare.

Vives in su c'has dadu e, si sa sorte,
pro "giusta legge", t'hat fattu siccare
non moris mai mancu can sa morte.

II°

Non ses pius fozidaee ubertosa,
nè fruttos bonos, che a deris, vantas;
est primmavera, eppuru non t'ammantas
amenamente bella e prosperosa.

Ma s'immagine cara e generosa
simboleggias, inneggias e decantas
in mesu 'e tantas floridas piantas
che una mama 'ona e amorosa.

Dai te sas piantas iffeschidas
godin, de maju, s'istupend'incantu;

sunt cun s'"isticcu" tou fioridas,
me, oe, tristu giughent su mantu;
e paret, in sas naes appassidas,
ogni gemm'una lagrima 'e piantu.


"CARRASEGARE, bidu a modu meu"

I°

Cantat, sonat e cun Baccu isghignazzat
in faccia 'e sa moderna gioventude;
basci'e volgare in sos coros impazzat
calpestende sa "Mistica Virtude".

S'oscena isfacciataggine carazzat,
nadat in d'una lurida palude;
su peccad'esecrabile sollazzat,
prosperat in s'ignobile salude.

Avidamente de brutales bozas
si saziat, impudicu e golosu,
cundidas de meschina vanidade,

contaminende sas vergines fozas
de su candidu "Lizu Virtuosu",
in d'unu mundu 'e immoralidade.

II°

De sa morale, in su limite giustu,
non est pius'unu divertimentu
chi tenzat contu 'e su permissu gustu
e de ogni educadu sentimentu.

Ma,cando tottu passat, s'idet custu,
(veladu in d'unu tristu atteggiamentu)
su chizu, de sas vittimas, iffustu
manifestat s'amaru pentimentu.

gioventude! "diligu fiore",
oe su lacciu impudicu ti dominat
ca non t'iscaldit su "Celeste Lume";

fui dai su turp'e brutu errore
chi su tou "Tesoro Sacru" abbominat,
e torra in sinu a su "Bonu Costume".

AMIGA RUNDINA

rundine, rundinella, bonassera
Torrada ses'a s'ospitale grunda,
armoniosa, festant'e giocunda,
cun s' .s'amen'e dechida primmavera

Su nidu as'agattadu senza dannu
subra su meu rustigu balcone,
e m'intonas, pro paga, una cantone
cun sas solitas notas de ogn'annu.

do so tristu e solu mi consolas....
frimma...No! non chelz'a tich'andare;
istasero ti chelzo arrejonare
o rundinella, si non ti che olas.

Sun tantos annos chi semus amigos,
e dogn'annu prezisa t'appo idu
torrare allegr'a su solitu nidu,
senz'olvidare sos "usos" antigos.

Cantas dios veloces sunt passadas,
cantos disizos e illusiones,
cantas penas e delusiones
amaramente, in sa vida proadas.

Osserva cuddu triste chiz'affrantu
chi l'has connott'allegru in su consolu,
oe est'abbndonad'e solu-solu,
s'unica cumpagnia est su piantu;

osserva cudda femin'in fastizu,
chi l'has connotta vispa e gioiosa,
cend'esser'un'amad' cara isposa
fut de sa vida s'unicu disizu.

De perlas 'e de dodes adornada
at logradu s'amen ambida brama,
oe, oe ma rundinella est'una mama
che medas, s'iscura, isconsolada.

In s'infantile dilettu, bonignu
cuddu pizinnu abaida, giocundu;
pro cust'est vanu e boidu su mundu
ca li mancat matecarignu su carignu.

Cun tegus appo idu iscenas tantas,
in custa vida brev'e procellosa,
però s'iscena pius gioiosa,
est cand'intendo sas notas chi cantas.