So un omine bòidu.
Hap'unu corpus de paza e cardos siccos,
sos ojos prenos d'entu,
e unu nidu de sorighe in cherveddos .. .
Custa forma ch'assustat sos puzones,
ch'est forma senza boghe, senza motu
o gestu marmuradu in ancas siccas
- a dardi fogu, faghet solu fumu -
custa forma ... so deo.
O non camino
o non bido sa rosa
o non la tocco
o no intendo s'abe
chi bolat pro su mele de sos bios ...
So goi ...
Mi biso cun sos chizos de sa morte ...
Ma, forzis, su corpus meu est un'ispiga
e sos ranos
sun ranos de amore ... ·
Sémenalos tue ch'as podère
intro su sulcu 'e su dolore meu,
- sa pena hat fecundadu su terrinu -
forzis brundin puppìas .
pro sos ojos tancados de sos zegos!