CAMPANA MUDA

A chintales sos chelos biaittos
promissa 'e lughe iscritt'han in sas undas,
ma nues airadas, vagabundas,
han cambiadu in umbras sos iscrittos.

E oe in sa labia 'e coro 'uddini
bramas in cria chi sa frebba brujat.
Su 'entu asciuttu, isfidiadu mujat
sos briones ch'in s'anima mi tuddini,

e che canna 'eretta chi s'ispinghet
a oj'a chelu disizos'e azzuda
si pijat a su 'entu umil'e muda
e subraffatta su terrinu linghet.

S'in sulcos siccos su semen s'abberit
e in tulas lanzas brottat e fiorit:
senza giomper a fruttu si che morit
in sa chelva chi 'ebbadas lu coberit.

Ahi! Cantu mi brujat cussu fogu
ch'hat alluttu sa innida cussorza.
Ahi! Cantu mi punghet sa resorza
chi m'hat segadu su filu 'e su giogu!

Sas carres bias, ancora s'ispina
de s'ammentu, e-i su coro mi trapassat,
ca finzas oe in s'intragna mi lassat,
de ranchidesa, un'indigesta irmina.

Ma una 'olta chi s'erva si siccat
non torrat a su 'irde genuinu!
E chie, una 'olta su lominu
azzesu, pro duas boltas iscriccat?

Ma no mi dolet s'interighinada
ch'est abberzende a s'iscuru sa janna,
né sa minetta de sa notte manna
in custu currere assustu mi dada.

Mi pittigan sas umbras chi trobeas
e accamos m'han filadu a sa cua
imbolighende 'e neula onzi frua
chi brottat in su truncu 'e sas bideas

inue ischido e drommo sos intentos
in segretu, senz"oghe né limbazu,
e che campana ch'est senza battazu:
muda restat pro cantos e lamentos.