CANDO SU CORO FIORIT

Vivin sos pensamentos biancos de prunizza
sutta sos caminos de sa notte,
cando su fiore morit a su nie.
Morin sas chigulas abbasoladas
e su porcabru sutta su cazzadore,
cando su coro fiorit a su sole.
Si azzenden sa luna in d'una notte
'e ilgerru, caligunu l'at domandadu?
Nottes allupiadas de sognos, abbréschidos
de néula ue s 'ésile cun sa bértula
bussaìat a una janna ch'at a restare serrada,
ammentu chi ue lu toccas dolet,
comente si fut istadu beru chi su mare
no b'est piusi.
Et deo nadaìa contra s'unda isperende
de toccare su fundu.
Si toccat sa morte cando sos disizos
sun brujados a su girasole 'e Van Gogh
e a s'apiu burdu de Emily Dickinson.
Si restat in vida cando un'uttìu 'e abba
mancat a su mare si est tempus
a su puzone 'e cantare.