Informazioni sull'opera

TESTO


Zuanne Paulu II pro sa paghe

A su fogu, a su fogu
abboghinende
Naraian zocchende in donzi janna
E sonaiat sa campana manna
A repicu cramende che sirena
Pro currere a su fogu azzesu appena
In presse a l'istudare coitende.

E tuccaian chin animu e coro
Pro s'iscaddura mala 'e carchi orta
Chi lassadu in su sartu a fune isorta
Donzi cussorza l'at passada a fogu
E postoso in sa idda in attotogu
Chin su linnarzu alluttu in domo issoro.

Gai matessi si pesat sa gherra
E de gherra c'at fumos in su mundu
E b'est Zuanne Paulu Segundu
Abboghinende
zocchende onzi janna
E d'est sonende sa campana manna
Pro istudare donzi cuntierra.

Chin d'una cadenedda in sa pettorra
Longa finzas a chintu e sa rughitta
E una coronedda beneitta
At ziradu su mundu tottu intreu
Pedende azzudu pro s'amore 'e Deu
Limusinende paghe a s'and'e torra.

Forsis ca l'at connotta e l'at suffrida
Sa gherra manna
sa pius reghente

Cando c'an postu in s'animu innossente
De sos piseddos odiu e rancore
Pro incunzare fruttos de dolore
De levas noas perdende sa vida.

Ma si fit cussa sa gherra mezzana
Itte ten'esser sas gherras de como
Ca morin prima sas mamas in domo
Chi no sos fizzos gherrende in su fronte
Tando abberu s'oscurat s'orizzonte
E sonat differente sa campana.



SCHEDA DELL'OPERA
TitoloZUANNE PAULU II PRO SA PAGHE
Sezione
AutoreNicolino Pianu
NomeB20040071
Anno2004 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2004 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo