UNU CUADDU CERAXINU

-1
M'indi scidu chizzi dogna mengianu
ma po essi' sinceru deu no dormu mai

sempri a serviziu de su cristianu
no tengu disigiu de ddu cambiai

ca bollu pensai-di essi' s'amigu
limpia che isprigu-est sa menti mia

percurru sa bia-sene fai fatiga
deretta s'origa-in su camminai.

-2
In su camminai trottu boriosu
a conca pesada cun s'ogu brillanti

su passu seguru su fai ariosu
m'hat donau fama di essi' birbanti

candu castiu ananti-no bollu barrieras
connosciu is maneras-de no fai fatiga

tengu una parìga-de vizius cuaus
totu perdonaus in su traballai.

-3
In su traballai no tengu rivalis
ddu narat su meri tenendindi gosu

ca seu su mellus no 'nci sunt egualis
i a pitturra manna fazzu su pomposu

no seu fogosu-ma bon' 'e masedu
ca seu su fedu-de bona famiglia
cun brusch'e istriglia-mi bollu pulìu
fazzu s'attrivìu-si 'nc'est di arriscai.

-4
Si 'nc'est di arriscai no mi tir'agoa
tenendi figau po 'ndi bendi puru

no mi spantu mai po sa cosa noa
mancai sia sunfrendi tengu sempri duru

no frigu su muru-cun su carrettoni
poita s'ascioni-costat su dinai

no boll'arriscai-de ingolli sa genti
tenendi presenti-de dda rispettai.

-5
De dda rispettai est in sa natura
ch'in su nascimentu Deus m'hat intregau

fìnzas po sa sedda tengu bardadura
conalla pintada e frenu traballau

candu seu mudau-che unu figurinu
is triccias in fini-beni pettonadas

tot'alliongiadas-po figura digna
cuadd' 'e Sardigna-bellu di ammirai.


(Antica forma di canto campidanese
detto "a curba" utilizza il dodecassillabo
ed il doppio senario "in sa torrada")

MEDVED Sergio
Via San Gerolamo
8
09047-SELARGIUS
Tel. 070/846442