Informazioni sull'opera

TESTO


TORRARE

Pro cunfortu de chie andat lontanu
a chircare fortuna in terr'anzena

mama natura benign'e amena
nos donat su podère pius arcanu:

Su podère de currer cun sa mente
e bolare tra montes e collinas

traessare campuras e marinas
e giambar'in s'istante continente.

Gai
chie non podet de persona
andat a bolu cun sa fantasia

a visitare sa 'idda nadìa
isettende ch'arrivet s'ora 'ona.

S'ora pro medas annos isettada
de torrar'a su nidu pius caru

ue teniat affettos e amparu
e hoe solu s'umbra b'est restada.

Babbu e mama si che sun bolados

ma cando torro los intend'ancora
dogni die pesende a s'aurora
pro pensar'a sos fizos istimados.

Oh Deus
ite gana de torrare!
Ite disizzu forte intro su coro!
Torrare tra sa zente chi adoro
e gai viver unidos tott'umpare.

Ma cun sa mente torro dogni die
a su logu da ue so partidu

ue da mama mi so dispedidu
unu manzanu gelidu che nie.

Issaras non l'ischia chi sa vida
est pius forte de sa voluntade!
Trazat e ligat senza piedade
in custa lotta ch'est mai finida.

Ma deo fin'a morrer non m'arrendo
ca sa vida pro cussu hapo lottadu!
Che barca in mesu mare burrascadu
su diritt'a torrare lu pretendo!

Forsis ad'esser un'illusione
chi mi muntenet viva cust'ispera

custu sognu
sa brama verdadera
chi diventat de vida sa rejone!


SCHEDA DELL'OPERA
TitoloTORRARE
Sezione
AutorePrimo Arca
NomeB2004001
Anno2004 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2004 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo