Terras brujadas


Occ'annu puru s'intendet su lamentu
pro sa barbarie chi no est mai passada;
bolat su fumu
guidadu dae su 'entu
cun sa chijina de una terra brujada.
Morin sas arbures chena una rejone;
fuen sos coniglios e fuen sos puzones!

Fuen sos puzones cun mannu disisperu

s'istracchidudine lassana in sos nidos

totos affrigidos e pianghende abberu
chircana logos dae omines non bidos
ca medas bortas su mandigu 'e s'arveghe
est destruidu e s'ornine at sa neghe.

S'ornine at sa neghe
leat tott'a giogu
imminorighende sas lacanas in coro;
sos chi buglian sempre e buglian cun su fogu
sun brujende tottu
mancari terr'issoro;
e puru sa zente in cust'arter'isfida
fuet a sa tzega e bi lassat sa vida.

Bi lassat sa vida pro custos mannos males
chena poder dare cunfortu né aggiudu;
tando custos versos (chi sun sempre attuales)
fettan pensare chie abbaidat mudu!
s'ischit: a fuire
che s'abba in sas coras

non resessin fiores
né canes e coloras.

Canes e coloras non frimman custa foga;
b'est sol'unu modu: bi pensen sos umanos

gai chi sa terra chi s'est fattende groga
nos torret amiga e nos leet sas manos
e gai chi si poset torra su lentore
subra padros birdes e ratos in fiore


finitamente a bidere semper su serenu
chi nos accumpanzet
a notte e a die

prò nos agattare e intender s'alenu
de s'aera frisca
che in tempu de nie.


Istevene Chessa - Sassari 22/07/1976
Via Roma 58 - 07040 Tissi (SS).
Tel 079/388319 - 349/2915897