Suelzu Antigu.

Sempre m'ammento 'e de caru suelzu
umbraghe preferidu a mesu die
cando in messera in iscias de suore
poniamus pannuzzos in benuios
in sa tua collina riparada
dae sos rajos allutos de su sole
in su mese accaldadu de alzolas.
Tue mudu e ancuiadu dae su entu
paraias urias
prò gustare recatos chena brou
de s'aunzu picante
chi sos oios faghiat lagrimare
e pagu manteniat sos fiancos.
Tue che zigante antigu
has connottu erenzias e annadas
isperas disizos e fadigas
in carenas consuntas che a tie
Pro temporios has fattu de fide testimonzu
de incunzas mannas e minores
de marguras de brazzos e de coro
e de isettos mai currispostos.
Has isfidadu su tempus revessu
temporadas de entu e de trascia
caldanas nuturales e de fogu
chenza mai murrunzos e lamentos.
che amigu 'e sa zente campagnola.
Cudda die ammentendemi de te
so ennidu a ti chircare in sa tanca de monte ruju
isperende de ti acciopare ancora forte che tando
ma tue non bi fisti piusu
bruiadu dae manos malaitas.