Su peus de sos males


Non chistionant piùs sos pilicanos:
solu su fundu 'e s'oju
calchi bia;
pro richesa chi apant
sos iscuros

addurant sen'ispera in poberesa

e biados
cando pro duos tenent unu coro.

Dae issos naschit su fiagu 'onu 'e sa limpiesa

unu fiagu de erbas antigas.
Bivinde puru in sa citad'eterna

biddaresos s'accatant de restare
cando bivene meda.

Sa 'ogh'intrinat su risu dolente
si allegana de s'eris insoro: e ca tropu ant piantu

como lagrimas mudas dant sos chizos.
A dies sa trèmula los binchet

ed est prite si bident imbezzende;
emo lis narat
ma a bortas nono
su relorzu crudel'e s'aposentu;
lis narat: 'eo totus bos iseto.

Non sognant piùs in sa bezzesa

tot'est iscritu su liber'insoro

e sa chiterra l'ant amarmurada;
mortu su can'e domo

su muscadeddu 'e sa die nodida
piùs non lis balet a pesare cantu.

Non si movent piùs sos tristos bezzos

pedras fadadas da una jana mala:
dae ojos
sas sinzas
a sas laras
adduene su sal'e su dolore.
Su mund'insoro est curtzu:
su letu
sa ventana
su le' e sa cadrea

su letu e i su letu.

E si 'essint ancora
unu a s'ater'astrintu

in sos bestires chirdinos insoro

est pro sighire in lughe soliana
de unu piùs canudu su disterru

sa dispedid'e unu fortunadu.

Tempus est de sucutos:
malas a ismentigare sas lanzas de su tempus

chi moliant in su mur'e s'aposentu:
emo narant e nono

narant ca los isetant.