Su pastoralismu


Istranzos ant regortu eredidade
de sas boghes naschidas in padente

cuncordadas in sinos e in mente

sunt cantigu 'e anzelica ermosura

mudant in gosu s'ispreu e tristura

lassant àndalas a s'umanidade.

Intro cuiles ant tentu brassolu

in oras de reposu e ispelegu

faghinde amantiosu buju tzegu

meres impare a tzeracos amigos

mancari amuntu e recatu mindigos

prapìant angustias e su dolu.

Donzi pastore criccande oghianu
sighit tazos in siccas istasones

cantat a bolu
s'appuntat cantzones

innidos versos cun s'amenu trazu

dae s'intragna
s'arcanu viazu
comintzant che sa rundine in beranu.

Iscola armoniosa chena trastos

ainas sunt limba e sa memoria

totu imprentant sa matessi istoria
ricca de identidade
dat sabore
a sos manizos e nuscant sentore
s'abilidade e maduros arrastos.

Patimentu e traballu chena isetu

da babu a fizu pro tempos sighidos

retzinde sos amparos meressidos

si bestint cun fiore 'e libertade

tzapant assentu in sa sotziedade

in donzi amezoru leant deretu.

Impreos sortint umiles fainas

sende fedu bi as iscrùfidu parte

como chi tenes iscannos in s'arte

poberu iscradu ses vera sienda

istrapatzadu
ti ses fatu prenda

riu de cultura in terras mischinas.

Mares
nuraghes e logos fadados

cun s'iscurtu de cuntzertu a tenores

pintos dae gradessidos colores

s'istiment che in fortzeris istuzados.


Giovanni Antioco Mura
nato a Ghilarza ( OR )
il 02.12.36
residente in Via Giovanni XXIII
2
09074 Ghilarza (.OR.)
telef. 0785 / 54502