Informazioni sull'opera

TESTO


SOS CADDOS SEDILESOS

Cussos fogosos caddos da' inue
nde sun bessidos a currer in campu
che luminosulugore de lampu
an sa groppera lughida totue.

Si nd' 'idet murros nieddos e bajos
cun trinas in su tuju e istellados
an ferros lughidos bene attaccados
nde falan currende ch' alcia 'e rajos.

Bellos e fortes caddos sedilesos
'Antine cun sa rughe bos cumandat
in die 'e festa ondrados bos mandat
cun fiores e campaneddos presos.

Sos cavaglieris fortes e balentes
los tenen firmos sos puddedros raros
ma daghi intenden sos primos isparos
lis moven lestros sas briglias in dentes.

Cun sos nastrinos lughentes de seda
bandelas santas giumpan su portale
sutta de s'arcu mannu triunfale
fattende pro Bantine onore meda.

Currende in tundu pighende efalende
paren gherrende contro Arianos
cun lantzas e bandelas in sas manos
a Costantine Santu difendende.

Nde falan dae sa costera tolta
sos puddedros che saettas currende
'asie su priore est onorende
Santu Antine un'attera 'olta.

Tzessana s' 'ardia e su rituale
sos beneittos caddos sedilesos
currende a bolu non si sun arresos
intrende salvos sempre in su portale.

SCHEDA DELL'OPERA
TitoloSOS CADDOS SEDILESOS
Sezione
AutoreMasala Giovanni
NomeB20040051
Anno2004 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2004 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo