Scurigadrosciu

Boscis e chescias atesu ...
prus atesu de su tempus
intendu nottesta.
Boscis
lamentus e zùnchius

contaus a tolla
de is isteddus de su stremau

in su mentris chi
una avatu a s'atra
si ndi àndanta is oras.
Sa lusci de sa giovunesa
si stramàncada me is undas
de unu mari mannu
chi arregòllidi dogna surrungiu
de su tempus passau.
A truba nd'aproìllanta is arregordus
candu manna est sa soledadi

e s'affòrtianta is dudas
de is oras stamancàdas
a 'olli' fabbricat in s'érremu
bisus chi s'hant' a spimpirinài.
E su Meri
passienziosu
abètada ...
carrigu che mai mai
de disigius dilicaus.
Atesu ... arretumbus tristus

zùnchius de su 'entu

fogus làngius de lusci

mi fainti cumpangia
in custi scurigadrosciu sullenu.
E candu su soli si scàllada
in su mari incillìu

solu solu m'hap' a perdi...
intr' 'e is brazzus de una Notti
chen' 'e Fini.


Ignazio Mudu
Via Lepanto 8
09032 Assemini (CA)
Tel.070/943174