SAS TRIZZAS

Proite tind'has segadu
Sae bellas trizzas nieddas
Cando fisti 'le sas piseddas
Su fiore piùs bramadu ?

E cheres chi non t'abbomine
Cun s'addolorida musa
Si da cando ti ses tusa
Ti ses trasformada in omine
Distruende in unu domine
Sa rara trizza ch'haisti
Sa foscighe chi giughisti
In cussu fatale istante
Malaighe lagrimante
Pro su cummissu peccadu

Sas trizzas fin'ornamentu
De sas antigas grecianas
De sas matronas romanas
Su piùs bramadu appentu
Cando isoltas a su entu
In sae modelladas palas
Coment'e fluentes alas
Lae lassaian falare
Dignas in su cunservare
Natura, decoro e gradu

Bella fit sa Madalena
Cando pro sa fide morta
Pianghende a trizza isorta
De Issa Cristos nd'hat pena
Nendel'a boghe piena:
Pesa,perdonada sese
Tand ' issa in sos nudas pese
De Gesusu nde frobbiat
Sa lagrima chi l'essiat
Da—e s'oju isconsoladu

Sas martires cristianas
A cant ' hapo leggid'eo
Nudas in su colosseo
Ca non fin che tue vanas
Isolvian sas galanas
Trizzas nieddas o brundas
Ch'ammantaian'a undas
S'oltraggiada nudidade
Miraculu 'e castidade
De puresa e de candore
Pro tutelare s'onore
Ch'haian'ereditadu

Proite tind'has segadu
Sas bellas trizzas nieddas
Cando fisti e sas piseddas
Su fiore piùs bramadu ?

Andria Ninniri