S A "S E R R A" DE IIDDANOA


Affacc'a Biddano, b'est sa "Serra"...
ite fortuna hat tentu bidda mia!
Oh! generosu Deus, ipsa ebbia
has preferidu,subra custa terra!

Est una, rocca a monte 'e s'adde manna
inue su Temo falat minoreddu,
alta, t'apparit, simile a casteddu,
o de su Chelu sa lizadra janna.

Ite no s"idet subra custa altura!...
s"ilde campagna ricca, tataresa,
sos montes de sa Corsica franzesa,
sa Nurra, s'Asinara, sa Gallura.

Dae s'ater'ala, de palas a bentu,
ammiras Biddanoa, bella meda,
Minerva, Rocca Doria,sa Canpeda,
eppuru Monte Rasu e Gennargentu!

manzanile, cando dae Limbara
s'accherat s'astru mannu de sa vida,
podes cumprender qui no s'est mai bida
una grandiosidade tantu rara!

Ma cand' a sero s'est bettendhe in mare
tota s'iscena accreschet de isplendore,
immensu fogu azzesu in pien'ardore
ti paret in su sonnu de ammirare!

Sa rocca 'e Cabu Cazza e Portu Conte,
Scala Piccada subra s'Alighera...
no! no ti paret una cosa vera
coment'est coloridu s'orizzonte!

Intendhes un incantu mai proadu,
t'abbizas qui ti mancat su respiru,
abbaidas in silenziu tot'in giru,
a Deus ringraziendhe,imbenujadu...

Pigat dae s ''adde hoghe de pastore:
est unu cantu dulche,dilicadu,
una promissa de coro donadu,
un innu veru de sinzeru amore.

Un abilastru bolat que unu lampu...
tunciat sa tonca, appeddat sa catedda...
josso,in sa balza, cantat sa pisedda...
puzones faghent coru in dogni campu.

Podes "serrare" asshora su: "balcone",
sos ojos pienos de sa vista bella,
ammira como sa, lughente istella,
e a mesa 'oghe, intona sa cantone...

No ses pius solu,cantigu de OSANNA
dae Chelu falat tando in cust'altura...
cantu in Sardigna hat fattu sa Natura
affacc'a bidda mia... est cosa manna!

Bastià Pirisi – VILLANOVA MONTELEONE