Motto: Su chelcu

SA RUGHE

Sa rughe mi est trista, su dolore
M'ammentada e mi nd' 'enidi su piantu,
Siada in domo che in campusantu
Cando la 'ido mi faghe terrore.

Oe b'ha sutta a tie unu fiore
Frittu, ma mi lu miru ohe incantu
Pro Bantu chi mi torra su piantu
E dai nou mi 'eni su dolore.

Tristu mi est su logu e pare feu
Cussa terra mi atti s'ispaventu,
Ca pare de intender su lamentu
De cudd'anima cara, Deus meu.

Ahi Rughe fatale, dali avvisu
Ch'inoghe so pro issa dogni die
E so pensende cantu 'ene a mie
Ha dadu cun gioia e sorrisu.

Narali chi la gitto sempre in mente
E non fuidi dai me cudda mirada
Chi mi faghiada cussa delicada
Cun sentimentu nobile, innozzente.

Eo no lu so, nò, indifferente:
Appo sos modos chi tue haisti
E so prezzisu comente lu fisti
De duos coro: unu e solamente.

Piango dai coro sempre a reu:
M'est dolorosa sa sua mancada
Non bido a issa cunfortu non cada,
Ca mi fid'issa solu su recreu.

Zesse su luttu, custu mantu feu,
Chi m'affrigi su coro cun sa mente
E torrede cudd'anima innozzente
Chi la desizzu a fiancu meu.

Dademi, Deus meu, cust'onore,
Chi preghende bo so senza cunfortu:
0 torred'issa o pur'eo mortu.
Solu goi pagades cust'amore.

Grazias tantas dai coro mando
E perdonu pro gantu happo pedidu
A bois Deus, chi m'azzis sighidu
In su duru dolore: raccomando.


Motto: Su chelcu

SA VEDOVA MARIA

In chirca 'e si campare fì Maria,
Sa vida li fì dura, su maridu
L'est mortu giovanissimu, e finidu
Ha amore sua in martoria.

Su segundu dolore fì su fizzu,
Chi pizzinneddu l'aia lassadu
Orfaneddu de babbu e fì privadu
Senza intender da isse unu cunsizzu.

Non podia fuire su trabagliu
Fi pro issa sa vera occupascione,
Contu non si daìada, sa regione
Li parìa pro issa sempre imbagliu.

E lu fì sempre in confusione
Preoccupada sempre a su passare
Ca non fì solu su fizzu 'e campare
Cantu li fidi s'educazione.

E si pone dezzisa 'e servire
Unu frade c'haiada inumanu,
In amore de fizzos fì lontanu
E dolu no intender ndend'ischire.

Solu chie ne tenede lu cumprende
Lassare sos fizzos a sos soloso
Su coro fì pro issa sempre a boloso
Poveru fizzu la fidi settende.

E li fì giusta sa sua mattana,
Lassa trabagliu e curre suspirende
A ue fì su fizzu pianghende
A boghe trista e chena nd'haer gana.

E s'abbrazza cudd'anima innozzente
Creide cun su coro umiliadu
Tantu chi hada a Deus pregadu
Chi morzende ne fidi indifferente.

Fritta nde resteidi desdiciada
Pensende a su restu 'e sa vida
E comente l'ha pregada, l'ha finida
Torrendebila a chie bi l'has dada.

Sa vida fì pro issa mesurada
Pro culpa 'e su frade, pagu 'onu,
E moridi cun su fizzu abbrazzada
Ibinugiada, pedende perdonu.


Motto: Su chelcu

SU POVERU E ONESTU TRABAGLIANTE

So poveru e amante 'e su saludu
Senza pretesasa e hamo sa regione
Su coro meu est coro de anzone
Piú l'iscuden piú s'istà mudu.

Tia gherre trabagliu, custu solu,
Non benes de fortuna, solu pane
E non viver comente ei su cane
Umiliadu e chena nd'haer dolu.

Se sera solu pro s'umanidade
Non fì pesu soffrire cussa pena,
Ma gando 'ido non c'ha pane a chena
E niunu non senti piedade.

Pritt'a su frade su coro non tenes
Abertu e convertidu de amore?
Candu mai non senti su dolore
Chi zessare lu podes cando cheres?

Sa pena pius dura est cando 'ido
Pizzinnos adorados a sa mesa,
Innozzentes e pienos de pretesa
E cun issos cuss'ira mi divido.

AhI Si 'olare podia in su momentu
Cun forza sana e abiles alas
'Eattire provvistas de annadas
Pro cuntentare a chie est discuntentu.

Si tue m' 'occhis non bi torro 'iu
ed est finidu su tou cumandare
Pensa 'e vivere, ma lassa campare
E a s'amore non nerzas mai odiu.

Si non ses goi leale e prezzisu
Semus che cane e battu abbaidende;
T'happo cumpresu, ma sias cumprendende
A cantu m'has battidu e m'has dezisu.

Su desizu chi happo est ch'eo sane
Cunvertendedi a tie anima e coro
E divente sa prenda, su desoro
De ghie ha bisonzu e su pane.

E cun tottu t'isetto e cumandare
E chi lu sias sempre su padronu
Ma non pretendas chi enza a s'indonu
Ponedi in conca chi devo campare.