SA ROCCA 'E S'ELEFANTE
(de Casteddusardu)

Da' s'iscuru 'e sos tempos

mai sa 'oghe
as ispartu in s'aera
pruite as cunservadu a sa muda
s'anima de pedra.

Pertusa che-i sa pedra fumiga

resonas ancora
de ritos sacrales

de paristorias e de presummu
de unu passadu 'e misteriu.

Lassan preguntas
sas intragnas tuas abbeltas
violadas a s'ispissa
dae alenos anzenos chi
compudan
bramosos
de isolver s'arcanu
de s'essere tou.

Ses tosta
ses rude

e s'abba
su 'entu...
no an consumìdu
sa mole tua pompiada.

Restas a sos posteros
testimonza de cantu
s'antiga zenìa sarda
faghiat 'e sa morte
su viver perenne.