SA PRESONE!!

Poberu leoneddu isventuradu
non fus gai in sa florida foresta

cando superbu cun grillos in testa
nessuna cumpromissu permittias

in cosas mannas che in sas pittias
fus'in s'idea tua apoderadu.

E como non ti faghes sa difesa
ca las perdida sa fibra fiera

e nen tentas de fagher a manera
a ti difender
nemancu po finta

fortzas prus no as e ne as grinta
perdid'in pumu las sa nobilesa.

Dae cando t'an fatu sa cattura
che vives in istrintu
raioladu
in d'una gabbia
ca ti an brivadu
liberu de rundare
ca s'istintu
t'an catzigadu
e ti an custrintu
viver contr'a natura in pena dura.

Como solu in su sognu ti ch'essis
po fagher runda in cussos buscos puros

in su sognu che saltias sos muros
impresonada non ti l'an sa mente

ma tue a fagher male a tanta zente
resessìdu non ses nen bi resessis.

Deo za ti cumprendo
c'apo idu
su dolu che a tie
sos afannos;
ca istadu bi seo in cussos pannos
pitzinnu e innotzente che a tie:
e m'an ferradu propiu sa die
chi sos tres lustros aia cumpridu!!

Sena mantza nen culpa e nen malitzia
un'annu apo proadu de inserru
umiliadu
penas de inferru
apo passadu
zovanu leone;
nois za nd'ischimus sa rejone:
est po chi tenzat lustru sa zustitzia.


G. A. Migheli