Informazioni sull'opera
Sa mesa
Sa rampa de s'iscala longa e dereta che pigaiat dae sa corte finas a su passarissu e a
sa gianna de coghina.
A su sonu amigu de su carillon sa Manetti e Roberts auguraiat Buon giorno. Unu
merulu ciulaiat e incumintzaiat su Giornale radio donzi chi die nos contaiat su chi aiat
fatu su presidente de s'IRI Petrilli. Sighiat sa litania de sa Borsa: Edison Magneti
Marelli Cucirini Cantoni...
S' aradiu fit in unu chizolu acurtzu a sa gianna de su curridore.
Sa gianna de sa corte e sa bentana
in sa matessi parada
a cara a Mesudie fint aundadas de sole.
Suta sa ventana
sa bartza de graniglia cun s'isceta de otone fit pr0 sa bogada e sa
toaletta de Pepinu.
Abba frita.
A ojos a sa bentana bi fit su lados curtzu de sa mesa.
Una mesa longa ue b'aiat logu pro totu sa familia e finas pro sos istranzos.
Subra sa mesa pendiat dae sa boveda una canna longa.
Giuaiat a apicare sa sartitza.
Sa sartitza las fiamus fatende.
Dae sa die innanti sa banca fit imbarratzada de conculos de terra a columu de peta e
ozu segados a biculeddos
de cantos de peta intreos
de corzu e sumene
sacheddos de
sale
de pibere nieddu e busciareddas de salnitro.
Sa faina fit in su mezus andare pro custu a su bustare l'aiant dadu un'ucone de mesa
acurtzu a s'aradiu aparitzada cun sa tiaza pijada.
Tres metres de tziminea a fraigu dominaiat sos furreddos a carbone. Francu su logu
pro s'immariu
leaiat totu sa parada dae sa gianna de sa corte a su curridore.
Inter sas duas giannas b'aiat passos meda.
S'immariu a muru
in su lados a ojos culvenaiat a segus de una tenda a frores sa
giorra de s'ulia.
La leaiamus a francas intrendeche su bratzu finas a su cuidu in sa murza. La
poniamus in d'unu pratu e nos linghiamus sos poddighes. S'abba aiat sabore de sale
de laru e de fenuju. La mandigaiamus cun su pane o sene pane a tot'ora.
Ma no si podiat learela sene sa trudda.
La leaiamus a s'accua tanchendenos sa tenda a palas.
In sos furreddos arrustiant sas bistecas de su porcu. Su nuscu nde prenaiat sa domo.
Sa nostra e sa de sos bighinos.
Su porcu giaiu l'aiat comporadu in Mara.
Unu lados.
L'aiamus giutu imboligadu in una fauna
in sa giardineria de tiu Franco.
A denote pro no pagare su datziu.
Duminiga fit una die bona cando semus andados a Mara.
Semus arrividos chito. Su porcu fit galu biu.
In bator l'ant agantzadu e chi l'ant iferchidu unu puntorzu in corpus. No apo bidu si bi
l'ant iferchidu in su coro o in su tuju.
Apo intesu su porcu tichirriende.
Su tichirriu de su porcu puntu no s'assimizat a perunu ateru tichirriu.
Apicadu a su muru a conca in giosso a mata in altu
cun sos tzancones bene presos a
battor craos fortes sa bentre isbarrada su porcu irrusciaiat samben in unu conculu.
Feminas morigaiant su samben.
Feminas samunaiant sos minuzos de su porcu.
Omines gruvennaiant su fogu. In s'interi bufaiant binu nieddu.
Sas feminas ant postu tucaru in su samben e pabassa e cicullate e sale. Cun s'imbudu
preneint su beraditu. Ant fatu una sartitza de samben. Una sartitza russa meda. L'ant
betada in s'abba buddende.
A bustare b'aiat cicioneddos cun bagna de porcrabu
porcheddu arrustu e immertzadu.
Apiu fenujanis e rabanella.
Sa sartitza de samben pro durche.
Aiant pro nois unu cumprire mannu ca giaiu aiat giutu a Mara sa currente eletrica.
Aiat istudadu sas candelas
sas istearicas
sas lantias e sas lampanas a carburu e aiat
atzesu sa lughe.
Fiat lux
aiat nadu nostru Segnore.
E finas giaiu.
E si comporaiat puru unu lados de porcu chi cheriat narrer bonu dinare.
Sa die ifatu
su manzanu sa coghina nostra fit diventada un masellu de peta de porcu.
A passa manu chi bessiant sartitza e salamine. Sas costiglias
su corzu e su lardu pro
fagher sa fae e lardu su gjoia de carresegare los cuguzeint de sale.
Tia Adelina no faghiat nudda. Issa trabagliat e no ischit fagher nudda.
Oe
in mesu a totu cust'untimu de porcu
est torrada dae ufitziu cun un' imboligu
mannu presu a ispau e cheralaca.
No est un'istrina. Est su cotimu.
Fintzas a cras no si nde faeddat nemmancu!- narat Luigina
afatzendada tra su bustare
e sa sartitza.
Cras sa sartiza penden subra sa banca.. Unu cantu longu de tela russa
posta suta sa
canna
inciumit sos butios chi nde falant.
Su porcu est isparidu.
Sa mesa est isbarratzada.
Setzidos a inghiriu de sa mesa semus
giaju Luigina
Adelina
Livia
Pepinu
eo e
Luisi. Eo apo ott'annos. Luisi deghe.
Adelina aberit s'imboligu.
Nde bogat matulos e matulos de Vaglias.
Adelina trabagliat in sa Posta. Est postelegrafonica. Che a babu.
Ma babu trabagliat in ufitziu ebbia.
Adelina trabagliat finas in domo.
Trabagliat finas in su letu. Finas cando est drommende est trabagliende.
Sos Vaglias sunt in colore de rosa.. Fozos mannos de pabiru in colore rosa.
Arivint dae tota s'Italia. imbiados a tota sa provintzia.
Oe las chirriamus sigundu s'imbiu.
Cras las partimus pro destinassione.
In ordine alfabeticu.
Adelina in mesu
partit
ordiminzat
controllat.
Iscriet in su rezistru a manu a manu chi li porrint sos matulos seberados.
Oe sa mesa est una carta zeografica ue su Nord e su Sud de s'Italia
s'oriente e s'ocasu
sunt a misciamureddu.
Ancona Alessandria Avellino Bergamo Brescia Brunico Caltanissetta Campobasso
Chiasso Como Cuneo Domodossola Ferrara Genova Grosseto La Spezia Milano
Modena Pescara Pistola Reggio Emilia Roma Sondrio Taranto Torino...
Deghemiza Chimbemiza Chimbantamiza Duamiza Vintimiza Chentumiza sunt sos
francos chi movent dae inie a inoghe.
Cras sa mesa est una carta zeografica de sa Provintzia.
Azos Ala Alighera Benetutti Bono Burtei Bulzi Carzeghe Casteddusardu Cheremule
Codronzanos Itiri Logusantu Martis Nulvi Olbia Patada Portu Turre Semestene
Sosso Telti.
Da inie a inoghe. Pro muzeres
babos
frades
fizos s'imbiu de cada mese
de cada tres
o ses meses o de onzi tantu de sa zente nostra chi est andada a torrare a iscrier sa
zeografia de Italia in ordine alfabeticu.
In su Nord chie at abilidade operaia o talentia pro l'imparare.
In Emilia
Tuscana e Latziu chie manizat sa marra e sos arveghes.
In sas istassiones de frontera sos finantzieris. In Roma in Genova in Milanu sas
teracas.
In Taranto e La Spetzia sos marineris.
E in totue in su territoriu nassionale soldados e carabineris.
Oe est recuidu Istevene.
A sas noe de note semus galu seberende.
No c'at nuscu de chena.
S'allumat sa sigareta e si c'andat a lezer su zornale.
Cras est recuidu Istevene.
A sas noe de note semus galu seberende.
No c'at nuscu de chena.
Istevene leat unu matulu de Vaglias
seberados e de seberare e che los betat in su boto
de s'arga.
Adelina s'atediat.
Andat a nde los acabidare dae s'arga.
Luigina inchendet sos furreddos.
Sa sartitza friet in su frisciolu.
Nos aundat su nuscu de s'ozu porchinu sufrissende.
| Titolo | SA MESA |
| Sezione | |
| Autore | Adriana Piras |
| Nome | C20030018 |
| Anno | 2003 |
| Argomento | |
| Descrizione | |
| Lingua | |
| Editore | Premio Ozieri |
| Contributore | TecnoService |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 2003 |
| Copertura | Italia, Sardegna, Logudoro |
| Diritti | Comune di Ozieri - Premio Ozieri |
| Analisi del Testo |