( Sa maladia e Pedru )

Pedru,chi tenet bella sa muzzere,
suffrit de una brutta maladia,
isfogat onzi die a piaghere
4 cudda cronica sua gelosia.

Apenas torrat dae sa campagna
cominzat s' attu primu c s'iscenada,
a boghe alta,offondet sa cumpagna
8 pro l'intender'in totta sa contrada.

E issa narat umil'e gentile
prit'onzi die pesas'abbolottu,
prite mi trattas che anima vile
12 naram ' ite difettos m'has connottu.


E issu indignadu totalmente
ca est dae sos nelvics iscossu;
nendeli traitora che serpente
16 comente trighe li brincat a dossu.

L'iscudet la maltrattat e l'offendet
cun paraulas de onzi zenia,
ca de cant'est afflittu no cumprendet
20 chi perdet gai amore simpattia.

Issa rezzit sos colpos poverina
pianghende che una criatura,
pro no fagher'iscandulos mischina
24 preferit d'esses posta in sepoltura.

Ma s'iscandalu est inreparabile
ca paret forsennadu su maridu,
sa maladia sua est incurabile
28 ca l'hat leadu fina, su sentidu.

Gas'una die a sa conclusione
d'un'ennesima lite iscadenada,
pro no fagher pius discussione
32 a domo de sa mama ch'est torrada.

Pianghende sa sua sorte mala,
cun sa mama si solit abbrazzare,
e Pedru,pianghende a s'ater'ala,
36 istat sempre preghendel'a torrare.

E torrat, a su nidu abbandonadu
oe su viver lontana,l'addolorat,
e agattat a Padru cambiadu,
40 como l'amat,l'istimat e l'adorat .