SU ZAPPADORE

"SAS BAGIANEDDAS DE IDDA"

Cando enides'a sa passizzada,
dechidasa, atraentese e pomposas,
paridese in d'un'adde, mariposas,
chirchinde sa friscura desizzada.

Ue passades, sa zenta ispantada,
bos'ammirat, che lizzos e che rosas,
pienas de saludu e prosperosas,
s'omine attirades a s'ogiada.

No'est'arte, ma donu de natura,
si presumides bellesa ogare,
in su eranu de sa gioventura.

Si fidi a modu, cun s'ogiu furare,
chie bos mirat, dai basciu a sura,
tian'zeltu che Paride proare.

SU ZAPPADORE

Agosto ,1960


"S' ISCOLA"

Cando fia pizzinnu,senza ghia
mi piaghiat, currer e a sa sola,
ischelveddadu, fuia s' iscola,
fattu su giogu, su menzus peldia.

Cun tristura m'ammento mamma mia,
miche giughiat'a s'imbola imbola,
sempre cun sos chelveddos ola ola,
senza pensare chi male faghia.

Ah ! si podia, piseddu torrare,
e currer cun sos liberos in manu,
a iscola olende che puzzone.

Como t'appo cumpresu, ma furriare,
non beni bene ca'so anzianu,
e pro cussu so legu e tontorrone.

SU ZAPPADORE

Agosto 1960


"SA FALCHE"

Dai tempus ti miro falche mia,
sempre in su cuzzolu fuliada,
pro cussu ti ses totta ruinzada,
cunsumendedi dentes e binzia.


Cando primu a messare ti giughia
luminosa parias un'ispada,
como no appo terra semenada,
tue ses che a mie in caristia.

Dai cando arressa ses'istada,
has peldidu bellesa e biancura,
cobelta de piuere e lighinzu.

In logu meu, che in zoronada,
su trabagliu t'a dadu sa lugura,
arressa diventada ses ruinzu.

SU ZAPPADORE

Agosto 1 960