S'OMINEDDU 'E SA FORTUNA


Torrende a su passadu cun s'ammentu
fagher non potto 'e mancu de pessare
a s'omineddu allegru e cuntentu
chi passaiat in carrela a nos giamare


Giughiat unu puzone e un'organeddu
cun d—una cascittedda de cartone
e andende sonaiat sa cantone
de sa bona-fortuna
s'omineddu.

Una femina l'accumpagnaiat

irrossettada e cun sa permanente
chi ripitiat: "Ajò
accudide zente!..
e nende goi si la ballaiat.

Ajò, lea-leade sa fortuna!...
.
e sonniaimis milli cosas bellas
immaginende chelu pienu 'e istellas
impratiadu dae ridente luna.

Pro signorina, lu deves leare
Prontu a cumandu
su puzone attentu
in punt'e biccu leaiat cuntentu
lestru unu bigliette
a bi lis dare.

A sa faina
bene ammaestradu.
Cando s'accurziaiat una pisedda

seberaiat dae sa cascittedda
cuddu destinu chi bi fit signadu.

Cun cussu bigliettedd'intro sa manu
li s'acchendiat coro e fantasia.
Sos tempos bellos de sa pitzinnia
mi sunt torrende a mente pianu pianu.

Maridu 'onu e riccu as'acciappare
e no est lontana meda, cudda die...
Leggiat a cor'in bula e rie-rie
s'avviaiat pro mezus sonniare.

Lestra, in pettorra si lu cuaiat
pro lu mantenner contu che tesoro.
Cun cuss'oriolu bellu in su coro
cuntenta,a domo sua torraiat.

...E, giraiat sa 'idda in largu e in tundu
abbellabbellu, dae manzanu a sera,
pro pagu 'inari nos daiat s'ispera
de sas pius bellas cosas de su mundu.