S' OLLU

"Ohi, ohi, sa brenti mia!
'Ta dannu, seu morendi!"
Che maccu zerriendi.
"E' sa pezz'arrustia,

oppuru sa 'nsalara,
ch'a prandi m'hei donau...
Mi doli' su figau,
portu sa brent' unfrara.

Deus miu, 'ta dolori!
Portai ollu callenti;
frigaimiddu 'n brenti
o avvisai su dottori...

No mi lasseis crepai!..."
Curri' mulleri mia,
callenta' s'oll"e olia,
curnenzar a frigai...

"Gesù, Maria, t'arrori!
ma it'esti custa spuma?...
No castieis sa suma:
fei benni su dottori!..."

Nanta: "Ddeus avvisau.
Citti: benir imoi..."
Su dottor ' est innoi.
"Nerimi, 'ta papau...

Sa lingua fazza biri..."
"Perdoni' s'ignoranzia,
ddi nau in cunfianzia
ch'hapu bistu bessiri

tanti spuma de brenti..."
Su dottor' arriendi,
'nzandu, mi fai cumprendi
su precisu comenti.


M' ha' nau: "It' esti zegu,
o teni' fissazioni?
Cust' est oll"e saboni.
Spum"e saboni gregu!".

ABBETTIOSU


PASTORI SARDU

Tot'a s'antiga, che a mille prus annu,
ses ancora, tui, umili pastori.
Tristu, sempiri prenu de annuggiori
ses, po su bivi a patimentus mannus.

Mesis e mesis chi no intras in lettu;
disigiosu de biri anima bia.
Scetti su tallu ti fai cumpangia,
su cani chi ti sighi' cun affettu.

Cantu nottis ti dormis istrentaxiu,
sonnendi unu pratt' 'e xena callenti...
Sa notti chi no sa brenti,
de ita dd'has prena? De pan' 'e xivraxiu,

de pilloncas, pagu casu saliu
o dus fundus de cardu molentinu
T'orbesci' , ti scurigar in camminu...
Mesu scurzu, bruttu, mali bistiu,

a barba longa, becciu prim' 'e s' ora...
Poberu rei de su tempus passau
Su scettru, su mantu t'est atturau...
Progressu? Mancu ,scis it' est, ancora.

Su mundu tu est unu furriadroxiu,
unu cuili fattu de fascinas.
S'addobbu?... Totu cosittas mischinas,
sa stoia, pag'o nudda cobertoxiu.

Poberu: su prus poberu de is Sardus.
Scaresciu, de nisciunus riconnotu;
contas unu candu donas su votu
po cuddus chi affogant in is miliardus.


Eppuru, in mesu a tanti tribulia
(frius, basca, dogn'ateru puntori),
po no intendi prus grai su dolori,
tui cantas, improvvisas poesia.

Cantas.' 0 sonas su sulitt'e canna.
Candu su sol'indor sa natura
cant ' andar ogu, ricca de pastura,
tui sonnas una tanca manna.

E a Dognassantu, pascend' is brebeis
mancai a barba longa e annuggiau,
Cun s'angionedd' a coddu carrigau,
paris ancora su Rei de is reis.


IS RIFORMAS

Sa riforma de is presonis
su Guvern'har approvau.
Mancu mali, nci ha pensau '
( mischimus!) po Is ladronis,

de arrob"e saccu bistius,
a istriscias, numeraus:
che sardina i imbarrilaus,
prenus de sordi, affrigius.

Non prus cellas; apposentus
a fentanas mannas mannas,
po chi scontint is cundannas
prus allirgus, prus cuntentus.

" Signor Tizio!..Sì, a lei..."
ddus izzerrianta po nomíni,
sia femina, siar omini:
no prus "1000", "100" o "6".

Sa divisa totu groga
a martingala 'n sa giacca
Biarus! Ndi faint spacca,
bistius aici a sa toga.

Prangiu, xena, colazioni
(poberitus!) menescinti.
Si no ateru, scarescinti
chi funt in d'unu presoni.

Unu parcu, sal''e giogu...
Cinema e televisori...
Accabau cuddu rigori:
mai prus pinnix'e priogu!

No presoní, no galera:
si nara; "Dom"e custoria".
Custa si che 'na vittoria
po sa gent'onesta mera!