S'EDUCASSIONE

Sa person'educad'est cuntentesa
De chie l'avvicinat frequente.
Cun bellu garbu mustrat sa grandesa
E s'attirat su geniu 'e sa zente.
Su bonu modu e i sa gentilesa
Si connoschet immediatamente.
Su dulche faeddare, sa manera
Accusat ch''est'un'anima sinzera.

S'educascione est nobile tesoro
Non b'hat ricchesa de l'aggualare.
Ca issa rendet dozil'ogni coro
Est pronta s'infelize a l'aggiuare.
Mai disizzat ne prata ne oro,
Su ben'anzenu solit disizzare.
De su bene chi faget non s'ammentada
De su cuntentu anzenu si cuntentada.

Sas Naziones andan'orgogliosas
Cando tenen sos fizzos educados.
Non sun supervas,sun silenziosas,
Esempiu a sos atteros Istados.
De su ripsettu, ca sun rispettoaas,
Alzan s'issoro pregiu a summos grados
E non poden'in malu cambiare
Ca s'educassione est'un'altare.

S'educadu diventat campione
de bonidade in caratter'e fama.
Rispettu giughet'a ogni persone,
Cumprire su dover'hat solu in brama.
Amat, adorat sa religione
Prediligit su babbu e i sa mama.
Ca non tenet in coro mancia e neu
Rispettat a sa Patria e a Deu.

POpulu caru,si custa morale
L'inserras in su coro e in sa mente
Chi distingas su bene e i su male
Eo ti prego in s'ottava presente.
Adempi lestru e sias puntuale
dovere e dirittos prontamente.
Ischis? S'educassione est mannu pregiu
Chie non l'usat faghet sacrilegiu!


SU PROGRESSU DE S'OMINE

S'omine est nadu dae su niente
E siat pro fortuna o disaura,
Senza difesa, affligid'e dolente,
Ispostu sempr'a caldu e a frittura.
Isculzu e nudu, miseru, indezente,
Lottende cun sa vergine Natura,
Affrontat risolutu e cun curaggiu
De sa vida s'imperviu viaggiu.

Però, cun oju tristu miraiada
De sa Natura sa confusione.
Sas piantas a roccas cunfundiada
Senza si tender'isatta rejone.
Ancora in s'Universu vagaiada
S'alidu caldu e sa Criassione,
E tando,cun pascienscia e bonidade,
S'est armadu de forza e voluntade.

A passu passu, tott'hat'iscobertu
Segretos e istintos naturales.
Tracciad'istradas in logu desertu,
Ferruvias e vias fluviales;
Iscolas, Istitutos hat'abertu
pro dare banda a sos terrenos males.
Efaghet'avanzare su progressu
tott'armonicamente cun suzzessu.

S'omine hat fattu comodas istradas
E fortes funivias in sos montes.
Atteras cosas las hat progettadas:
Prosciugamentos e pensiles pontes.
E oe,cun sas macchinas aladas,
Dominat infinitos orizzontes
E, applicadu in custas cosas bellas,
Iscrùtat su segretu e sas istellas.

Intentada non b'hat cosa peruna,
Cun bonu sensu hat tottu calculadu.
In cust'ultimu tempus pro fortuna
Sa via Ispaziale s'hat signadu.
Puntat sos razzos suos a sa luna
cun idea e coraggiu illimitadu.
Poi sulcat su chelu in ogni essu
Pro fagher fiorire su grogressu.