S'AVRESCHIDA

M'ACCER'A SU BALCONE SU MANZANU
PRO IDER DE SU SOLE S'AVRESCHIDA

SA TER'ANCORA TOT'ALLENTORIDA
M'ISOJITAT MURMUTTENDE PIANU PIANU.

SENTO INTRO 'E CORPUS UN AFFANNU

SU CORO M'ANDAT CHEI SA LETTORINA

MI CURRET SUPRA PALAS UNA FRINA
E IN OJOS SI MI PONET UN IMPANNU.

MI PONZ'A S'INTENTU A ISCULTARE

CHI HAT ITE MI NARRER EO CUMPRENDO

CHI M'ISVELET ARCANOS NON PRETENDO
MA PARET CHI MI CHEFFAT COSSIZARE.

SA LUCHE BIGONZOSA CHE AMANTE
TREMA TREMA ABBRATZAT SA NATURA
CUN AFFETTU L'AUNDAT DE DULCURA
E SA VIDA BRIONIT IN S'ISTANTE.

S'ISTIRAN SAS NUES CUN PAGU BRIU
A MANU TENTA POSTAS A CORONA
E SU CHELU POMPOSU CHE MATRONA
A SA LUNA CH'ISPARIT DAT S'ADIU.

CIULAN SOS PUZONES CHE TENORES
TOT'IN FESTA PRO SA DIE NOVELLA

TANTO CHI SI CUAT S'ULTIM' ISTELLA
DE SU MUNDU S'ISCHIDAN SOS COLORES.

IN PETTUS MI CH'INSERRO CUST'INCANTU
UE OGNI COSA PARET IMMORTALE

TANT'ISCO CHI PRO LEGGE NATURALE
NON MI ND'AP'A GODIRE CHISSÀ CANTU.

SA SORTE PODET ESSER TRAITORA

NON LI ZEDO SONNOS E ILLUSIONES
MI ND'AP'ACCAPULADU A MILLIONÉS
E S'EST CHI POTO MI ND'INCUNZ'ANCORA.