RUSIGNOLU

SA campagna torreit in fiore,
e-i sos puzones, a chelu torrados,
bi 'ettaian cantos de amore.

Birdes torrein tancas e cunzados,
e-i sos campos, pienos de isplendore,
ehe a festa solenne fin parados.

Finzas sas pedras cambiein colore.
In su chelu serenu e indeoradu,
torreit che a prima ogni rumore.

E tue, intr'e una gabbia inserradu,
miraias, pienu 'e tristura,
sos logos 'ue prima haias boladu.

Attesu,'idias lughendhe sa pianura,
e aiscultaias sas campanas
de arveghes ispartas in pastura.

Cun s'oju triste,miraias luntanas,
in-d-unu mare 'e lughe,che de oro,
lughida' sas calandras solianas.

Tandho s'ammentu t'istringhiat su coro,
e a s ' intirinada,candho solu
sas ranas cantaian tottu in coro,

daias isfogu a s'inserradu dolu,
e isparghias in chelu melodias
bellas che-i su piantu,rusignolu.

A sos chelos chi perdidos haias
tranquilla unu sero fit montendhe
sa luna 'e arghentu ch'amaias.

Su 'entu, a murrunzu,appeighittendhe
fit sa campagna. Chigulas e grillos
sutta su chelu fini serenendhe.

Candho canteis:prima duos trillos
acutos, poi caglieis,poi fruscieis
limpidos versos, puros che zampillos.

Cantos perdidos benes ammenteis,
rusignolu amadu; cantos bolos,
cantas dies de amore lagrimeis!

Candho, chirchendhe s'umbra e sos cuzolos,
faghias amorosas serenadas
a sa cumpagna tua; candho dolos

e penas ti fin cosas ignoradas.
Cale piantu fatteis in s'ammentu
de dies chi pro sempre fin passadas!

A passitos, piedosu, andheit su 'entu.
Ogni 'oghe caglieit: soberanu,
isconsoladu, solu su lamentu

soneit tou de morte.Adìu 'eranu,
adìu vida mala ' e iscunfortu,
adìu sole chi lughes invanu!

A manzanile t'accioppei, mortu,
cun su cantu pius bellu sepoltu.

SALVATORE FARINA
VICOLO S.PELLICO 2 OZIERI