Informazioni sull'opera

TESTO


Gosos pro sos caddos

Si no as de fagher nudda
e ti binchet sa catzedda

beni a currer sa pudda
in sos sartos de Caredda.

Sos caddos bene mudados
sunt de meda istripidande

proite istare isettante
paret los at infadados

jughent sos frenos tirados
sos cadderis in sa sedda.

Beni a currer...


Sas puddas chena faeddos
a sa fune bene istrintas

de su sonnu parent bintas
jughent sos ogos nieddos.
Aboghinant pitzocheddos
cun sa oghe che cannedda.

Beni a currer...


Un'olidu de muscones
a sos caddos jant trumentu

si ponent in movimentu
cun s'apretu 'e sos isprones

sulant comente su entu
ingrujados che forredda.

Beni a currer...


Cun longos fustes in manos

cabanellas e berritas

tzuganas e cadenitas

mancant solu sos cabanos

parent cantande jampitas
in mesu 'e sa feurredda.

Beni a currer...


Cando est ora 'e comintzare
totu istana chietos

sos caddos sunt inchietos
non los podent subacare

sas puddas cherent bettare
pro las ponner in padedda.

Beni a currer...


Sos primos pro sa partentzia
si sunt postos a fiancu

non podent fagher de mancu
de aer bella presentzia

iscurtant cun passientzia
sos àteros de sa chedda.

Beni a currer...


D'edade su prus piticu
sas carrelas at apertu

però manc'una nd'at fertu
mancari su croppu sicu

e sas puddas chena afficu
sunt totu a tremuledda.

Beni a currer...


Sos àteros cun corazzu
non si lassant ispantare

e isettande a tzuccare
sighint a fagher marrazzu

cando cumprint su viazzu
sunt acutzos che limpedda.

Beni a currer...


Parillas e a sa sola
totu faghent su dovere

sa zente at piaghere
de los ider cola
cola

parent faghinde s'ispola
intro una canistedda.

Beni a currer...


Su mamentu 'e acabare
sas manos tzacurrant forte

a sos caddos faghent corte
e los cherent carinnare

ma non si lassant toccare
olant che musca maghedda.


Beni a currer...


MURA Giov.Antioco
nato il 2/12/1936
a Ghilarza (OR) ed ivi residente nella via
Giovanni XXIII al n° 2
tel.0785 / 54502



SCHEDA DELL'OPERA
TitoloPRO SOS CADDOS
Sezione
AutoreMura Giov. Antioco
NomeA2003007
Anno2003 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2003 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo