POETAS


Galu incue

amus a essere


chin s'urtima iscuricada


prus allargu 'e sa cussentzia

prus serentes de un'ammentu

dae s'atera
banda
'e sos bisos

medinde campos unzados
dae tempestas de mudiore.

Su borbòre prus ufrau
an a danzare
sas apes

e sas rundines... a dillu!
a issurdare chelu e amantes
mai istracos
in s'aposentu
de un'imperiosu istìu

abbumbau de sole e bisos

e de crìas

oru 'e sa janna

mesurande sa distantzia
tra iscarpittas chin sos taccos
e un'ispricu passentziosu
pro pispisare -...t'amo-.

Incue

amus a essere

cando su tempus
s'an a aer bibiu
e su desizu
frichinau
in tantos -... m'accuntento -...
Fintzas
chi cada chìchera
no at a tenner prus seranos
e sos frores

isporados

ch'an a isperder s'abbundanzia

nois


...amus a esser incue


a sumire dae sos ocros
sas urtimas chimeras
de su mundu.