Informazioni sull'opera

TESTO


Poesia

Amentu ses
ses bida
ses antiga
cumparis in paragulas e tonos
cando silentes si faghent sos sonos
de boches
arresonos e de brigas.

Iscrita ses in litteras de bentu
chi mùghint in sos coros atrivìdos
medas bortas nos semus dispedidos
lassende in coro fertas e lamentu.

Iscrita ses in lìteras de oro
nùes de fogu allùtas a ponente
unu nuscu chi pùnghet de repente
una mirada istampàda in coro.

Iscrita ses in boghes de arvòre
in mùlios ses
in belios de lachinza
vrìghidas de puzones in sas binzas
in lampos chi trapassant su mudòre.

Ses unu moni in s'anima presente
galu non ses in verbos intramada
e punghes sos sentidos
ses cuvada
pro t'isvelare in limbas a sa mente.

Ses arte
labor limae de poetas
ses custodida suta s'apparentzia
uve si ligat sa corrispondetzia
in sensos allumados de profetas.

Ses unu cantu lene
poesia
unu lizeru murmure intrannau
presente in s'universu
t'at chircau
in su desertu su profeta Elia.

In sas aèras ses
ses in profundu
mudas sasformas
mudas soscolores
naschis in raighìnas de amore
ses sa bellesa chi movet su mundu.

Antonia Mulas - Sanile 30.01.1948
Via Limbara
18 08100-Nuoro
tel.0784.204124



SCHEDA DELL'OPERA
TitoloPOESIA
Sezione
AutoreAntonia Mulas
NomeB20030056
Anno2003 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2003 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo