Informazioni sull'opera

TESTO


Trintasettein...

ONORE A SA SARDIGNA.


Una nota
unu cantu
unu tenore

duas rimas assoltidas a pare

unu ballitu
unu sonu
una festa.

Istimada in totue
mama onesta

diritu as tue chi apretziada sies
terra 'e Sardigna
de folclore fiama;
istimada in totue
onesta mama

as diritu apretziada chi sies tue;
mama istimada
onesta in totue

as diritu chi tue sies apretziada;
mama onesta
in totue istimada
tue ch'apretziada sies as diritu.

Una nota
unu cantu
unu tenore

duas rimas assoltidas a pare

una festa
unu sonu
unu ballitu.

Sonos antigos
pipiolu
sulitu

amigos bonos ch'intonu portades

ballos e dansas nde pesan a bolu;
sonos antigos
sulitu e pipiolu

portados a intonu
amigos bonos;
pipiolu
sulitu
antigos sonos

a intornu portaos
bonos amigos;
sonos
sulitu
pipiolu
antigos

bonos amigos portados a intonu.

Una nota
unu cantu
unu tenore

duas rimas assoltidas a pare

unu ballitu
una festa
unu sonu.

Che veru re chi regnat in su tronu
a ballare su pe impegnat lestru

impompadu si mustrat e fieru;
chi regnat in su tronu che re veru
a ballare su pe lestru impegnat

che veru re ch'in su tronu regnat
lestr'a ballare impegnat su pe

ch'in tronu regnat che su veru re
lestru impegnat su pe a ballare.

Una nota
unu cantu
unu tenore

unu ballitu
unu sonu
una festa

duas rimas assoltidas a pare.

Bonos poetas nados po cantare

nidas e nettas cun rimados metros
bogan poesias che raros padronos;
nados po cantare poetas bonos

nidas e nettas cun metros rimados;
bonos poetas po cantare nados

metros rimados cun nidas e nettas;
nados po cantare bonos poetas

metros pulidos cun nettas e nidas.

Una nota
unu cantu
unu tenore

unu ballitu
unu sonu
una festa

duas rimas a pare assoltidas.

Garas a bolu
fatas e infretzidas

raras limas adatas bos acutan

dan onore
Sardigna
a tie solu;
infretzidas
garas fatas a bolu

raras limas bos acutan adatas;
infretzidas
a bolu garas fatas

bos acutan adatas limas raras;
infretzidas
a bolu fatas garas

bos acutan adatas raras limas.

Una nota
unu cantu
unu tenore

unu ballitu
unu sonu
una festa

assoltidas a pare duas rimas.

Sende chi custa terr'ancora istimas
po ch'at valore ogn'ora difendèla
siat in paghe siat in cuntierra;
sende ch'ancora istimas custa terra
po ch'at valore difendel'ogn'ora

sende ch'istimas custa terr'ancora
po ch'at valore ogn'ora la difende

ch'ancora istimas custa terra sende
difendèla p'ogn'ora ch'at valore.

RETRO

Unu ballitu
unu sonu
una festa

duas rimas assoltidas a pare

una nota
unu cantu
unu tenore.

Tres faghen coro
unu est cantore

piaghen tantu cun s'insoro tragiu

dae conca t'ammachian fin'a pese;
un'est cantore
faghen coro trese

piaghen tantu cun su tragiu insoro;
un'est cantore e tres faghen coro

cun su tragiu insoro tantu piaghen;
un'est cantore e tres coro faghen

cun su tragiu insoro piaghen tantu.

Unu ballitu
unu sonu
una festa

duas rimas assoltidas a pare

unu tenore
una nota
unu cantu.

Zente pomposa
colores e mantu*
*su costumene
frores de tota sa gloriosa ratza

paren bestidos de sole lughente;
mantu
colores e pomposa zente

frores de tota sa ratza gloriosa;
mantu
colores e zente pomposa

de sa gloriosa ratza tota frores;
zente pomposa
mantu e colores

frores de sa gloriosa ratza tota.

Unu ballitu
unu sonu
una festa

duas rimas assoltidas a pare

unu tenore
unu cantu
una nota.

Mi nde onoro che sardu patriota

ti soe iscrinde a coro abeltu
cun animu fieru e galiardu;
mi nde onoro che patriota sardu

ti so' iscrinde a abeltu coro;
che sardu patriota mi nd'onoro

a coro abeltu ti soe iscrinde;
che patriota sardu onorominde

a cor'abeltu iscrinde ti so'.
... ... ...
Totu t'ammiren che una cartolina
ca fin'in su folclore ses reina!



Antonio Piras
Scano Monti/erro
01-10-1950
Viale Kennedy
15
09078 Scemo Montiferro (OR)
Tel. 3403396408


SCHEDA DELL'OPERA
TitoloONORE A SA SARDIGNA.
Sezione
AutoreAntonio Piras
NomeA2006008
Anno2006 
Argomento 
Descrizione
Lingua 
EditorePremio Ozieri
ContributoreTecnoService
Tipo 
Formato 
FontePremio Ozieri
RelazioneConcorso Premio Ozieri 2006 
CoperturaItalia, Sardegna, Logudoro
DirittiComune di Ozieri - Premio Ozieri
Analisi del Testo