Ocros mannos


At ocros mannos sa fèmina mea
E mirant su mare.
At labras capassas de amare
E coro ch'ischit sufrire
At a caminare in bias de luches
Chi li sunt cumpanzas
Chircande in cara de pessones
(in sa cara de sa zente)
Sa delicadesa de s'amore suo.

At ocros mannos sa fèmina mea
E bàdiant su chelu.
E durche est a s'infunder
In làcrimas
Chi nemos at a bider.
At a badiare s'ora
Nd'at a intender su tocheddu
E su ziru de sas fritzas
At esser petzi ziru de amore.

L'as cumpresu

Sicuru chi l'as cumpresu:
Custa cantone est pro tene
Pro tene
pro tene
Chi arribas semper tardu
Chi mi dassas in sos bisos
De su chi oramai s'est fughidu.
Mi faco unu ballu tundu

Unu ballu tundu in prata
E no isco si mai m'apo a firmare.
M'ischerto una pitzinna

Una zovana bella
Chi m'incantet
m'indioset
Cun ocros de isteddu brillantes.

At ocros mannos sa fèmina mea
Chi bàdiant sa vida
Cussa chi s'at dassadu morrer
In coro suo;
Chi bàdiant su rujore
Ch'at picadu su postu

Ch'at rispostu
A sas dimandas sighidas
(a totu sas dimandas);
Chi bàdiant a comente li tocheddat su coro
Pustis de un'atera note de amore.

Chie at a ischire mai
Si s'aba si nch'at picadu
Amarguras e impudos
De chie ischit chi sa batalla sichit.