NURAXI ARRUBIU

Podessi ponni' infatu
contai totus is passus
e atobiai is arrastus
lassaus in dogna mori
po strantaxai atrevius
turris in s'oru 'e is bisus...

Podessi mai arregolli
sa melodia de araxis
chi ancora hoi m'intregant
su nuscu e is coloris
de seddas e padentis
e sa paxi 'e is campus
tra pabaulis e trigus...

Podessi mai cumprendi'
su chi hant atruessàu
e arregortu is mitzas
arritzolus i arrius
prima de lompi' biadus
a imprassai su mari...

Podessi mai incotiri
s'ammaju de cussus celus
e su misteriu arcanu
de is nottis de ossidiana
chi hant billàu pastoris
e gherreris in giriu a is fogus...

Podessi chistionai
a custas perdas rujas
arrandadas de su tempus
chi ancora mi fueddant
che is boxis de 'omu mia...

E sempri prus accanta
mi lompit s'arretumbu
de cantus e anninnias
dejanas e pipìus
chi m'inghitzant a sodigai biatzu
in custu dominariu 'e luxi
de storia e de memoria
strantaxu facci a celu.

Guglielmo Piras
Nato a Quartucciu il 3.12.1945
Via Marconi n.62
09048 - SINNAI
Tel.070-766249