Nuraghe mannu.

A puppadas
s'urtima amnistia
'e sos bentos

fruschian in s'adde
umbrosa

e semenan galu antigas carreras
de Luna.

Pilos de Janas...
irrogan sa lastima 'e sas predas
in pittu 'e sas mudesas de pratta

s 'irmentigu 'e su tempus

In sos predarios adrommaos
dae sa travuntana

ardores de nuscos de chessa
cundit galu su perdonu 'e su sole.

Trattas romanas d'antigas umbras caminantes
imboladas in su sedattu 'e sas predas
frimmas in su campusantu'e su tempus.

Cantigos d'istrias...
cummentan sas lunas antigas

supra su nuraghe accucconau che unu nidu
in su cucurinu 'e s'aera
ue sa cussorza ridiat a sa vida amadricà

E sa mudesa e s'anima a caddu e sos seculos
s'est imberta
in percas depruincas de soledade.

E ammentos ammentos...
biazana
iffustos chin lacrimas de pruere

istriulan galu sa bennida dae Miare de s 'urtimu invasore
E aboghinat aboghinat...s 'urtimu pellitta
perdiu tremiza 'e annos fagnet... in sa lacana 'e su tempus.