NOTTI DE FASTIGIUS.

Est una notti :cura, e su bentu
fridu cumenti 'e nii, e s'umidadi,
parid ' chi fazzanta una caridadi
a is anoraus preus de penzamentu.
E' notti 'e fastigiài; de bixianu
sa genti trappassera no è incaràda
in sa ventana, ma morta 'e frius attitirigada
crepad ' crocàda finzas a mangianu.
E' su prexu de Arrosa, ipsa ddu scidi
ca mei nottis aici 'e tempu mau,
su picciòccu suu cabada 'e medàu
poita è seguru ca nemus ddu bidi,
e dd'aspettada, trogàda a isciallu
firma e tremendu in su pottelittu,
chi ndiessad' ' e su scuru che un pisittu
eaccostid' senza chi ddi siad' traballu.
Finzas chi lompidi, tottu imboddiàu
cun ddu gabbanu nieddu de orbacci
chi in foras lassada scetti sa facci
bella e cuntenta de omini stimàu,
e accostada e saludad's: bona notti,
Arrosa mia stimada de su coru,
-bona notti branhu, bellu, tesoru,
ipsa arrespondidi tremendu prus affòtti..
-ita gana tenis tui? Cumenti stais?
-Non ce mali. Ma prangiu sempri e po tui mi trumentu,
ti sciu in mesu de straccia e bentu
penzu a cumenti bivis e ita fais.
Ma immoi seu prexada e s'allegria
accanta tua mi torrada a su coru,
accosta ca t ' imprassu, ca t'adoru
prenda stimada de sa vida mia.
Ma prima narami: cand ' è chi tui torras de seguru?
no ni lessisti meda in penzamentu.
-Bivi tranquilla, torru ua notti 'e bentu,
de straccia de frius e de iscuru.

PAN' E CASU


BALLICCA BALLOCCA.

Ballicca Ballòcca:
una scimpra de bidda,
muccòsa, babòsa,
che limu e anguidda
tottu piccigòsa.
Fragòsa è che mocca,
e caddòtza che porca

è setzia in ddu scannu
in mesu 'e su sobi
do appenas orbesciu,
e pottada asutta una crobi
'e checchei, su fragu pudesciu
in prazza t'ha dannu
su intendi a tott'annu.

Su scannu è scoxàu
e bandada e benidi
ca ipsa s'incrubada,
e cun is forzas chi tenidi
s'accirdiada e attrubada
cumenti 'e un tiàu
de bois craccaxàu.

Sempr ' è sanziendu
dromèndu ua pippia
chi ha fattu sa mamma:
fai nanna anninnia,
ddi narad' sa stramma,
yè sempri narèndu,
tzerriendu, cantendu:

—Su stòri su stòri
su stòri e sa stría
appattanta innàri
in ddu campu 'e tiria
attesu de mari,
e fadendu s'amori
ddu su bidi un pastòri.

Scedada? Biada
Ballicca Ballòcca!
Ca cantada e arridi
cun boxi 'e piocca
e nudda no iscidi,
yè sempri prexada
mancài lastimàda.

PAN' E CASU.


A UNA PICCIOCCA BRUNDA.

Portas sa conca brunda che su nenniri
chi pcinti in cresia sa giobia santa,
e ita si a is bint'annus fessi accanta
e cun tempus in cantis po nci benniri
a ti castiài cumenti sesi e nanta,
bella, bianca e prena de colori
cument'est in benàu omnia frori,
e sempri allirga cument' e una pispanta.
Nci a benni po unu mesi, e che un licòri
ti nci a srubì a itasisiada jenìa,
e candu yastessi tui de mei istasìa,
de mimmi iasta azzettai puru s'amori.
E pustis? Pustis tui yastessi mia
che una prenda nodìda e tottu fogu,
po mei yastessi su trustullu 'e giogu
de tenni cun amori e gelosìa.
E miada a parri passendu in sa bia
cun tui, di essi su prus imbidiàu,
su prus cuntentu, su prus assottàu
de tottu is omis chi teinti cumpangia.
E tui? Tui puru cun mei de Tui stimàu
prus che susuncu stimad' sa sisina,
iasta parri sa mellus reina
cun Mei giovunu e bellu a su costàu.
Ma tottu custu e attera faìna
chi a bint'annus siguramenti ia fai,
oi ddu biu e ddu deppu disigiài
che montangesu chi disigia' sa marina
E cosa mala è su si deppi rassegnài
a custa edàdi chi ndarruidi a craccu,
e poguss'è chi a tottu deu m'affràccu
a su bellu chi mi faid' bivi e bisài.
E si pur' esti casi un fai de maccu
a disigiài s'edàdi chi è fuìda
che unu bisu, custu aggiudada in sa vida
a ponni pèi e arrì de d'omnia sciaccu.

PAN' E CASU.