MUNDU NOU,
Paraulas de su sole).

e Eo, cale divinu ambasciador
Paghe preigo, paghe a sos mundanos:
Populos totu, dadebos sas manos!
Vivat sa vida, sa paghe, s'amore!

In ogni biddizzola, ogni zittade,
Olvidados sos dolos et pibios,
A litteras de oro, fizzos mios,
Bido "Sa Via De Sa Veridade".

Ei sa veridade est praticada,
Totue, dae mannos et minores;
Et respirant, piantas et fiores
Aria de veridade profumada.

S'istranzu in bidda anzena pe ponzende
Hat basos de sa pius bella agiana;
Sa idea de sa carre ch 'est lontana...
Et paret unu prinzipe arrivende.

Sos maridos chi lassant sas muzzeres
In podere de amigos et parentes
Sunt seguros che cando fint presentes,
Adiu, falzos, bascios piagheres!

Totu bellu est et santu. Su dolore
Azzettadu est cum animu serenu
Su malture cantende a lenu a lenu
Paret grascias torrare a su Segnore.

In sos affidos b ' est su mundu intreu,
Cosas raras cantende a boghe manna;
Et totu abbrazzant de domo in sa gianna
Custos isposos in nomen de Deu.

Mai nesciunu suerat de badas,
Nemos traighet, ognunu est cuntentu,
Et produit sa terra de unu chentu,
Sunt finas sas annadas cambiadas.

In sas dies de festa in sos balcones
De ogni palte et logu,a d'ogni entu,
In sos mares da ogni bastimentu
Bogant una bandera sas pessones.

Tota est bianca:"Caridade et Fide"
-Si bi legget-"Trabagliu et Allegria"!
Ah! Sa vida!Ite bella poesia!
Omines totu, creide, creide!"

Fiorin Fiorello.


S'OMINE.

Est bellu de fattura, de ammirare,
Su menzus de ogni essere vivente.
De differentes razzas,est presente
In sa terra, su mundu pro onorare.

Campare ischit et morrer pro amare
Trabagliat cum su brazzu et cum sa mente;
Re, fizzu de unu Re tantu potente,
Padronigat in chelu, terra et mare.

Babbu de meravizzas sas pius bellas,
Torrat a nudda, ei sa vida sua
Tando cominzat pius santa et pura.

Cust'a d'ognunu narant sas istellas
Ti sa rìsida luna posta in fua,
Su sole et totaganta sa natura.

Fiorin Fiorello.


ORA SANTA.

Beneittu su mundu, beneittu!
Cand'una mama allattat narat"Deu"
Et issa: Fizzu meu, fizzu meu,
Mai pattas nè famine et ne frittu!

Risponder paret su puppu rassittu:
Cuncoldia in su mundu totu intreu!
Nemos sentat in s'anima unu neu;
Su pane buschet ogni poverittu!

Narat s'olia: Est custa ora 'e paghe;
S'ispiga narat :Cust'est ora santa;
Ei sa mama: Sabiu ti faghe.

Et abbrazzat et basat su pupittu
Cum su coro cuntentu canta canta...
Beneittu su mundu, beneittu!

Fiorin Fiorello.