Mundu iscurigosu.


In custu mundu nieddu che tura
s'omine non agatat sa leada
de sa fide non bidet sa lugura.

Paret terra malaida e frastimada
criadolzu de disamistade
amore e piedade piùs non c'hada.

Su frade occhit su mattessi frade
non b'hat rispettu pro sos genitores
ma briga e droga sempre in cantidade.

Non c'hat ne dignidade ne onores
fundamentu de ogni cunvivenzia
virtude chi abbacat sos dolores.

Si usat in tottue prepotenzia
contra su piùs debile e famidu
usende inari malu e falza iscenzia.

S'amore genuinu amus feridu
a lu sanare non ponimus cura
parimus tottu fora de sentidu.

E de sas gherras non amus paura
si est naschende gherra in ogni logu
ue non dana mancu sepoltura

S'iraq e Palestina est lende fogu
paret su regnu de su disisperu
chenza paghe asseliu e disaogu.

In die 'e oe non paret abberu
chi non acciopen modu 'e los frimmare
prima chi brujet tottu s'emisferu.

Si bi la sighin goi a bumbardare
non la frimman sa zente chi est fuende
e non los fazzilitan a torrare.

Tottu naran chi sunu cumbattende
pro sos dirittos de s'umanidade
chi sos atteros sunu violende.

E non tenen peruna piedade
pro sos pizzinnos chi sunu perende
sutta bombas de ogni calidade.

A tottu sos chi sunu cumandende
un'appellu faghimus accoradu
salvade custu mundu ch'est brujende.