MIRENDE S'ABBA.

Cando arzio appena sa mirada
Ite incantu! Mirende a totta vista
de montes e costeras d'onzi crista
bianca dae s'urtima niada.

Tando miro su sole in s'orizzonte
pighende alluttu che tara potente
chin sos rajos e s'alidu caente
sorvende in abba su nie in su monte


E b'ido s'abba isparta
innida e pura
ispumosa abberzendesi caminos
a murmuttu in istrampos e trainos
accudende a su riu in sa bassura.

Colat lestra ischidende onzi funtana
dende briu e ispera in d'onzi bicu
e curret
forsis curret in s'afficcu
de lompere a su mare innida e sana.

Ma no totta bi accudit a su mare
chin cudda limpiesa 'e su trainu
meda si perdet o faddit caminu
chin abbas malas bettendesi appare


E finit cue sa puresa sua
s'abba liera 'e sos montes niados
in su lutrinzu e pojos bulluzzados
ischida
prena 'e zinzula e de lua.

E l'assimizzo a sa naschida umana
chi no tenet sa sorte garantida
cando in pojos luados de sa vida
ruet sa naschimenta innida e sana.

Ma no si perdet cue sa mirada
in pojos de builuzzu a pagh'ispera
torrat mirende a cudd'abba liera
isorta dae s'urtima niada.

Nicolino Pianu
Anela (02/09/1933)
P.tta Roma 5
07010 ANELA (SS)
Tel.:079799176