IN PENSIONE GIUANNE MASTRU

Mastru Giuanne finz'a sa 'ezzesa
no hat bidu che penas e fadigas:
miserias presentes e antigas
ue est passadu, semprepoveresa;
foghiles istudados cun sa mesa
piena solu 'e murrunzos e brigas,
ispanzadas de famine e deunzu
da-e su pagu pane e pag'aunzu.

Isvilidu 'e tantos patimentos
fit gai gai a dare dispidida
a s'impiegu e cambiare vida
pro no intender ateros lamentos
e intrar'in sa classe 'e "sos cuntentos
zente pensionada e no famida,
pro che passare sos ultimos annos
in tranquillidade e senz'affannos.

No connoschiat sos pensionados
e los creiat rassos e attatos,
padronos de terrinos e palattos
e de 'inaris finzas murgherados;
ma tres nd'incontrat lanzos fadigados,
malancinidos e gai maltrattos
chi l'han fatt'una tal'impressionede
zente essinde da una presone.

E duos fini contende sas dies
cantu nde mancaiat a su trèighi:
a unu li pariat chi fin sèighi,
s'aturu: "Degheotto mesudies
deven benner ancora ma no sies
isvariadu o cheres chi ti prèighi
chi custu mese no est de vintotto
e pro cussu nde mancat degheotto"?

Agiummai si fini raffiados
pro cussas duas dies in cuntestu.
Benit Mastru Giuanne a passu lestu
e si presentat a sos tribulados
nende:" Allegros,o pensionados,
chi deo puru cantu pius prestu
e a segundu sa condizione'
e sa classe, mi nd'enz'in pensione.

"Deo so reduidu terra terra
-ndi essit unu - e primu fia reu,
ca tando mi daian pan'intreu
e como mi nde toccat una perra;
chie narat ch'est culpa 'e sa gherra
atere chi castigos sun de Deu,
e no che mancaisti si no tue,
cane runzosu, bessi da' igue"!

PENSIONATO -VIA SARDEGNA,N.3
ORISTANO(Cagliari)