MANZANU

Bèssit su sole. Plaghidu su mare,
mandat lampos de fogu: già rosadu
est totu s'orizzonte, gai chi paret
a frangias d'oro et de prata ricamadu.

Inoghe,una funtana pispisare
s'intendet et in su buscu profumadu
de chercos, sos puzones piulare,
saludende puru su creadu.

Totu est incantu, totu est resplendore:
in chelu, in pithu 'e monte, intr"e sas tancas,
ammantadas de flores, flores, flores.

Séttidu in d'una preda, cum d'un'anca
supra s'atera, frùschiat su pastore,
a una chedda de chentu baccas biancas.

(Salàsi )


NINNA NANNA

Ninna nanna, ojos de mare.
bucca 'e rosa, pilos de oro;
t'happo in intro de au coro,
non ti potho ismentigare.

Ninna nanna, ojos de mare.

In su tou barzolu 'e arghentu,
totu in seda tapezzadu,
ti ch'hat mamma collocadu
cum amore et cum assentu.

Ninna et dormi, fizu meu,
ch su sonnu est chi ti sanat;
mih chi in foras trumuntana
est muilende....titti.....Oddeu!

Ninna et dormi, fizu meu.

In su buscu cum sa luna,
sas deidades sunt filende
sa tua sorte et preparende.
ti una vida forte et sana.

C anta canta risignolu,
non t'istanches de cantare,
ca est dormende in su barzolu,
fizu meu ojos de mare.

Mentras dormis, biancu lizu,
sos bestires de isposare,
t'happa a manu ricamare...
Ninna nanna, amadu fizu.

Un'anzone, seberada
dae sa chedda, t'happa a dare,
bella bianca sonazada...
Ninna nanna ojos de mare.

Una erveghe, una vitella,
una bacca allatantina,
una domo manna et bella
et pro isposa una regina,


biunda hermosa, ricca 'e inare,
un'arzola cun laores,
una tanca plenu 'e flores...
Ninna nanna, ojos de mare.

Zente a palas de sa janna,
pronta est pro ti che furare...
Dormi fizu et faghe nanna,
ninna nanna, ojos de mare.

(SALASI )


COMO ET TANDO
A mia madre

Como chi mancas, sa domo nos paret
unu desertu siccu totu arena;
nave sene guvernu in mesu mare,
in sa puppa istampada et in sa carena.

Prima che fisti tue chi una sirena
parias virtuosa, digna de ammirare;
de sa domo sa Fada,pius serena
sa vida, o mamma, nos faghias passare.

Como tue nos mancas: su piantu
Begnat in domo nostra;su dolore
est troppu pro te,oggettu amadu tantu.

Pruna fit totu risu et totu amore;
sa vida nos pariat un incantu,
dulche comente unu beranu in fiore.

(Salàsi)